ಕೊರೊನಾಗೂ ಕ್ಯಾರೇ ಎನ್ನದ ಕರೋಡ್‍ಪತಿಗಳು

ಅದು 2020, ಭಾರತ ಮಾತ್ರವಲ್ಲ, ಇಡೀ ವಿಶ್ವ ಕೋವಿಡ್ ಎಂಬ ಹೆಮ್ಮಾರಿಯ ಹೊಡೆತಕ್ಕೆ ಸಿಕ್ಕಿ ನಲುಗಿ ಹೋಗಿತ್ತು. ಎಲ್ಲಿ ಕೇಳಿದರಲ್ಲಿ ಲಾಕ್‍ಡೌನ್. ವ್ಯಾಪಾರ, ವಹಿವಾಟುಗಳು ಬಂದ್. ಜನಸಾಮಾನ್ಯರ ನಿತ್ಯದ ಓಡಾಟಕ್ಕೂ ಬ್ರೇಕ್ ಬಿದ್ದಿತ್ತು. ಇದರಿಂದಾಗಿ ದೇಶಾದ್ಯಂತ ಕೋಟ್ಯಂತರ ಮಂದಿ ತಮ್ಮ ಉದ್ಯೋಗ ಕಳೆದುಕೊಳ್ಳಬೇಕಾಯಿತು. ಕೆಲವರು ತುತ್ತು ಅನ್ನಕ್ಕೂ ಪರದಾಡಿದರು. ಆದರೆ, ಹಲವು ಶ್ರೀಮಂತರ ಸಂಪತ್ತು ಈ ವಿಷಮ ಪರಿಸ್ಥಿತಿಯಲ್ಲಿಯೂ ವೃದ್ಧಿಯಾಗಿದೆ ಎಂಬುದು ವಾಸ್ತವ ಸಂಗತಿ. ಇದರಿಂದಾಗಿ ದೇಶದಲ್ಲಿ ಬಡವ ಮತ್ತು ಶ್ರೀಮಂತರ ನಡುವಿನ ಅಂತರ ಭಾರಿ ಪ್ರಮಾಣದಲ್ಲಿ ಹೆಚ್ಚಿದೆ ಎನ್ನುತ್ತದೆ "ಆಕ್ಸ್‍ಫಾಮ್' ಸಂಸ್ಥೆ ಸಿದ್ಧಪಡಿಸಿದ "ದಿ ಇನ್ ಇಕ್ವಾಲಿಟಿ ವೈರಸ್' ಎಂಬ ವರದಿ.

ಕೋಟ್ಯಂತರ ಮಂದಿಯ ಉದ್ಯೋಗ ನಷ್ಟ:

ಭಾರತದಲ್ಲಿ ಮೊದಲ ಬಾರಿಗೆ 2020ರ ಮಾರ್ಚ್ 25ರಿಂದ 21 ದಿನಗಳ ಕಾಲ ದೇಶಾದ್ಯಂತ ಲಾಕ್‍ಡೌನ್ ಘೋಷಿಸಲಾಯಿತು. ನಂತರ, ಮೇ 31ರ ವರೆಗೂ ಹಂತ, ಹಂತವಾಗಿ ಲಾಕ್‍ಡೌನ್ ವಿಸ್ತರಣೆಯಾಯಿತು. ಇದರಿಂದಾಗಿ ಕೋಟ್ಯಂತರ ಮಂದಿ ನಿರುದ್ಯೋಗಿಗಳಾದರು. 2020ರ ಏಪ್ರಿಲ್‍ನಲ್ಲಿ ದೇಶದಲ್ಲಿ ಪ್ರತಿ ಗಂಟೆಗೆ 1 ಲಕ್ಷ 70 ಸಾವಿರ ಮಂದಿ ಉದ್ಯೋಗ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದರು. ಬಡತನ ರೇಖೆಗಿಂತ ಸ್ವಲ್ಪ ಮೇಲೆ ಇದ್ದ ಸುಮಾರು 40 ಕೋಟಿ ಮಂದಿ ಕೆಲವು ತಿಂಗಳ ಮಟ್ಟಿಗಾದರೂ ಬಡತನರೇಖೆಗಿಂತ ಕೆಳಗೆ ಬಂದಿದ್ದರು. ಏಪ್ರಿಲ್ ತಿಂಗಳೊಂದರಲ್ಲಿಯೇ ದೇಶದಲ್ಲಿ ಸುಮಾರು 12.2 ಕೋಟಿ ಉದ್ಯೋಗ ನಷ್ಟವಾಗಿದೆ. ನಿರುದ್ಯೋಗ ಪ್ರಮಾಣ ಶೇ.27.1ಕ್ಕೆ ಏರಿಕೆಯಾಗಿದೆ ಎನ್ನುತ್ತದೆ ಭಾರತೀಯ ಆರ್ಥಿಕ ನಿಗಾ ಸಂಸ್ಥೆ, ಸಿಎಂಐಇ ವರದಿ. 

ಅಂತಾರಾಷ್ಟ್ರೀಯ ಕಾರ್ಮಿಕ ಸಂಘಟನೆ, ಐಎಲ್‍ಒ ಹಾಗೂ ಏಷ್ಯಾ ಅಭಿವೃದ್ಧಿ ಬ್ಯಾಂಕ್, ಎಬಿಡಿ ವರದಿಯನ್ವಯ ದೇಶದಲ್ಲಿ 18-24 ವರ್ಷ ವಯೋಮಾನದ ಯುವಜನರಲ್ಲಿ ಶೇ. 23.1ರಷ್ಟು ಮಂದಿ ಕೆಲಸ ಕಳೆದುಕೊಂಡರು. ಉದ್ಯೋಗ ಕಳೆದುಕೊಂಡ ಪ್ರತಿ 10 ಜನರಲ್ಲಿ ನಾಲ್ವರನ್ನು ಶಾಶ್ವತವಾಗಿ ಕೆಲಸದಿಂದ ತೆಗೆದು ಹಾಕಲಾಯಿತು. ಪ್ರತಿ ಹತ್ತರಲ್ಲಿ 6 ಮಂದಿಯನ್ನು ವೇತನರಹಿತ ದೀರ್ಘ ರಜೆಯ ಮೇಲೆ ಕಳುಹಿಸಲಾಯಿತು. ಈ ಅವಧಿಯಲ್ಲಿ ಅವರಿಗೆ ಬೇರೆ ಕೆಲಸ ಸಿಕ್ಕಿಲ್ಲ. ಹೀಗಾಗಿ, ಇವರೆಲ್ಲರ ಭವಿಷ್ಯ ಅತಂತ್ರವಾಯಿತು. 

ಕೃಷಿ ಮಾರುಕಟ್ಟೆಗಳಲ್ಲಿನ ಹಮಾಲರು, ದಿನಗೂಲಿ ಕಾರ್ಮಿಕರು, ಸಣ್ಣ ಉದ್ದಿಮೆಗಳಲ್ಲಿ ಕೆಲಸ ಮಾಡುವ ನೌಕರರು, ಶಿಕ್ಷಕರು, ಪತ್ರಕರ್ತರು, ಆಟೋಮೊಬೈಲ್, ಹೋಟೆಲ್, ರಿಯಲ್ ಎಸ್ಟೇಟ್, ಪ್ರವಾಸೋದ್ಯಮ ಸೇರಿದಂತೆ ವಿವಿಧ ವಲಯಗಳಲ್ಲಿನ ಜನರಿಗೆ ಲಾಕ್‍ಡೌನ್‍ನಿಂದ ಹೊಡೆತ ಬಿತ್ತು. ಸಮಾಜದ ಅತ್ಯಂತ ದುರ್ಬಲ ವರ್ಗದ ಜನ ಅತಿ ಹೆಚ್ಚು ಸಂಕಷ್ಟಕ್ಕೆ ಒಳಗಾದರು. 

ಸಣ್ಣ ಉದ್ದಿಮೆಗಳು ನೆಲಕಚ್ಚಿದವು. ದೊಡ್ಡ, ದೊಡ್ಡ ಕಂಪನಿಗಳು, ಬಹುರಾಷ್ಟ್ರೀಯ ಕಂಪನಿಗಳು "ಕಾಸ್ಟ್ ಕಟಿಂಗ್' ಹೆಸರಲ್ಲಿ ಉದ್ಯೋಗಿಗಳನ್ನು ಮನೆಗೆ ಕಳಿಸಿದರು. ಇದರಿಂದಾಗಿ ಉದ್ಯೋಗಗಳ ಸಂಖ್ಯೆ 8.2 ಕೋಟಿಯಿಂದ 6.5 ಕೋಟಿಗೆ ಇಳಿಯಿತು. ಹಲವೆಡೆ ಉದ್ಯೋಗಿಗಳ ಸಂಬಳದಲ್ಲಿ ಕಡಿತ ಮಾಡಲಾಯಿತು.  

2020ರಲ್ಲಿ ದೇಶಾದ್ಯಂತ 10,113 ಕಂಪನಿಗಳು ಸ್ವಯಂಪ್ರೇರಿತವಾಗಿ ಮುಚ್ಚಿವೆ ಎನ್ನುವುದನ್ನು ಸ್ವತ: ಕೇಂದ್ರ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯದ ಸಮಿತಿ ತನ್ನ ವರದಿಯಲ್ಲಿ ಸ್ಪಷ್ಟಪಡಿಸಿದೆ. ಈ ಪೈಕಿ, ದೆಹಲಿಯಲ್ಲಿ ಅತಿ ಹೆಚ್ಚು ಅಂದರೆ, 2,394 ಕಂಪನಿಗಳು ಬಾಗಿಲು ಮುಚ್ಚಿದರೆ, ಬಿಹಾರದಲ್ಲಿ ಅತಿ ಕಡಿಮೆ, ಅಂದರೆ, 107 ಕಂಪನಿಗಳು ಬಾಗಿಲು ಮುಚ್ಚಿವೆ. ಕರ್ನಾಟಕದಲ್ಲಿ 836 ಕಂಪನಿಗಳು ಬಂದ್ ಆಗಿವೆ.

ಹಲವರ ಸಂಪತ್ತು ಏರಿಕೆ:

ಆದರೆ, ಇಂತಹ ಮಾನವೀಯ ದುರಂತದ ನಡುವೆಯೂ ಹಲವರ ಸಂಪತ್ತು ಏರಿದೆ. 2020ರಲ್ಲಿ ಭಾರತದ 40 ಮಂದಿ ಉದ್ಯಮಿಗಳು ಬಿಲಿಯನೆರ್‍ಗಳ ಪಟ್ಟಿಗೆ ಹೊಸದಾಗಿ ಸೇರ್ಪಡೆಯಾಗಿದ್ದಾರೆ. ಲಾಕ್‍ಡೌನ್‍ನ ಮೊದಲ ಕೆಲ ತಿಂಗಳಲ್ಲಿ ಉದ್ಯಮಿಗಳ ಆದಾಯಕ್ಕೆ ಕುತ್ತು ಬಂದರೂ, ಕೆಲವೇ ದಿನಗಳಲ್ಲಿ ಇವರು ಚೇತರಿಸಿಕೊಂಡಿದ್ದಾರೆ. ಈ ಅವಧಿಯಲ್ಲಿ ಇವರ ಸಂಪತ್ತು ಶೇ.35ಕ್ಕೂ ಹೆಚ್ಚಿನ ಪ್ರಮಾಣದಲ್ಲಿ ಏರಿಕೆ ಕಂಡಿದೆ.

2020ರ ಮಾರ್ಚ್‍ನಿಂದ ಡಿಸೆಂಬರ್ ಅಂತ್ಯದ ಅವಧಿಯಲ್ಲಿ ದೇಶದ ಪ್ರಮುಖ 100 ಬಿಲಿಯನೆರ್‍ಗಳ ಒಟ್ಟಾರೆ ಆದಾಯವು 12 ಲಕ್ಷ, 97 ಸಾವಿರದ 822 ಕೋಟಿ ರೂ.ಯಷ್ಟು ಏರಿಕೆಯಾಗಿದೆ ಎನ್ನುತ್ತದೆ "ಆಕ್ಸ್‍ಫಾಮ್'ನ ವರದಿ. 

ಅದಾನಿ ಗ್ರೂಪ್‍ನ ಸಂಸ್ಥಾಪಕ ಗೌತಮ್ ಅದಾನಿ, ರಿಲಯನ್ಸ್ ಸಂಸ್ಥೆಯ ಮುಖ್ಯಸ್ಥ ಮುಕೇಶ್ ಅಂಬಾನಿ, ಎಚ್‍ಸಿಎಲ್ ಟೆಕ್ನಾಲಜಿಸ್‍ನ ಶಿವ ನಾಡಾರ್, ಪೂನಾವಾಲಾ ಗ್ರೂಪ್‍ನ ಅಧ್ಯಕ್ಷ, ಸೈರಸ್ ಪೂನಾವಾಲಾ, ಕೋಟಕ್ ಮಹೀಂದ್ರಾ ಬ್ಯಾಂಕ್‍ನ ವ್ಯವಸ್ಥಾಪಕ ನಿರ್ದೇಶಕ ಉದಯ್ ಕೋಟಕ್, ವಿಪ್ರೋ ಸಂಸ್ಥೆಗಳ ಒಕ್ಕೂಟದ ಮುಖ್ಯಸ್ಥ ಅಜೀಂ ಪ್ರೇಮ್‍ಜಿ, ಭಾರ್ತಿ ಎಂಟರ್‍ಪ್ರೈಸಸ್‍ನ ಸಂಸ್ಥಾಪಕ ಸುನಿಲ್ ಮಿತ್ತಲ್, ಡಿ ಮಾರ್ಟ್‍ನ ಸಂಸ್ಥಾಪಕ ರಾಧಾಕೃಷ್ಣನ್ ದಮಾನಿ, ಆದಿತ್ಯ ಬಿರ್ಲಾ ಸಂಸ್ಥೆಗಳ ಮುಖ್ಯಸ್ಥ ಕುಮಾರ ಮಂಗಲಂ ಬಿರ್ಲಾ ಹಾಗೂ ಅರ್ಸೆಲರ್ ಮಿತ್ತಲ್‍ನ ಅಧ್ಯಕ್ಷ ಲಕ್ಷ್ಮೀ ಮಿತ್ತಲ್ ಅವರ ಸಂಪತ್ತು 2020ರ ಮಾರ್ಚ್ ನಂತರ ಭಾರಿ ಪ್ರಮಾಣದಲ್ಲಿ ಏರಿಕೆಯಾಗಿದೆ.

ಅದಾನಿ ನಂ.1:

2000 ದಿಂದ 2021ರಲ್ಲಿ ಈವರೆಗೆ ತಮ್ಮ ಸಂಪತ್ತನ್ನು ಗರಿಷ್ಠ ಪ್ರಮಾಣದಲ್ಲಿ ಹೆಚ್ಚಿಸಿಕೊಂಡ ಉದ್ಯಮಿಗಳಲ್ಲಿ ಗೌತಮ್ ಅದಾನಿ ಮೊದಲ ಸ್ಥಾನದಲ್ಲಿದ್ದಾರೆ. ಈ ಅವಧಿಯಲ್ಲಿ ಟೆಸ್ಲಾ ಸಿಇಒ ಇಲಾನ್ ಮಸ್ಕ್, ಅಮೆಜಾನ್ ಸಿಇಒ ಜೆಫ್ ಬೆಜೋಸ್ ಅವರನ್ನೂ ಮೀರಿಸಿರುವ ಅದಾನಿ, ತಮ್ಮ ಸಂಪತ್ತನ್ನು ಬರೋಬ್ಬರಿ 1 ಲಕ್ಷ 18 ಸಾವಿರ ಕೋಟಿ ರೂ.ಯಷ್ಟು ಹೆಚ್ಚಿಸಿಕೊಂಡಿದ್ದಾರೆ. 2016ರ ವರೆಗೂ ಅದಾನಿ ಅವರ ಆಸ್ತಿಯ ಮೌಲ್ಯ ಸುಮಾರು 25 ಸಾವಿರ ಕೋಟಿ ರೂ.ಇತ್ತು. ಅಲ್ಲಿಂದ ಪ್ರತಿವರ್ಷ ಅವರ ಆದಾಯ ಏರುತ್ತಲೆ ಇದೆ. 2020ರಲ್ಲಿ ಅವರ ಸಂಪತ್ತು ಶೇ.50ರಷ್ಟು ಏರಿಕೆಯಾಗಿ 12 ಲಕ್ಷ ಕೋಟಿ ರೂ.ಗಳಿಗೆ ಏರಿಕೆಯಾಗಿದೆ. 

ಇನ್ನು ಮುಕೇಶ್ ಅಂಬಾನಿ ಈ ಅವಧಿಯಲ್ಲಿ ಪ್ರತಿ ಗಂಟೆಗೆ ಗಳಿಸಿದ ಆದಾಯ 90 ಕೋಟಿ ರೂ.ಗಳು. ಅವರ ಪ್ರತಿ ಒಂದು ಗಂಟೆಯ ಗಳಿಕೆ, ಕೌಶಲ್ಯರಹಿತ ಕಾರ್ಮಿಕನೊಬ್ಬನ 10 ಸಾವಿರ ವರ್ಷಗಳ ಗಳಿಕೆಗೆ ಸಮ. ಹಾಗೆಯೇ ಅಂಬಾನಿಯವರ ಪ್ರತಿ ಸೆಕೆಂಡ್‍ನ ಗಳಿಕೆ ಕೌಶಲ್ಯರಹಿತ ಕಾರ್ಮಿಕನೊಬ್ಬನ ಮೂರು ವರ್ಷಗಳ ಗಳಿಕೆಗೆ ಸಮ ಎನ್ನುತ್ತದೆ "ಆಕ್ಸ್‍ಫಾಮ್' ವರದಿ.

ದೇಶದ ಪ್ರಮುಖ 11 ಮಂದಿ ಬಿಲಿಯನೆರ್‍ಗಳು ಕೋವಿಡ್ ಅವಧಿಯಲ್ಲಿ ಗಳಿಸಿರುವ ಗಳಿಕೆಯ ಮೇಲೆ ಶೇ.1ರಷ್ಟು ತೆರಿಗೆ ವಿಧಿಸಿದರೆ, ಆ ಮೊತ್ತದಿಂದ ಸರ್ಕಾರ ಜನೌಷಧ ಯೋಜನೆಗೆ ಮಾಡುವ ವೆಚ್ಚವನ್ನು 140 ಪಟ್ಟು ಹೆಚ್ಚಿಸಬಹುದು. ಅಥವಾ, ಈ ಮೊತ್ತ ಗ್ರಾಮೀಣ ಉದ್ಯೋಗ ಖಾತರಿ ಯೋಜನೆಯನ್ನು 10 ವರ್ಷಗಳ ಕಾಲ ನಡೆಸಲು ಅಥವಾ ಆರೋಗ್ಯ ಸಚಿವಾಲಯದ ವಿವಿಧ ಯೋಜನೆಗಳನ್ನು 10 ವರ್ಷಗಳ ಕಾಲ ನಡೆಸಲು ಸಾಕಾಗುತ್ತದೆ. 

ಭಾರತಕ್ಕೆ ಮಾತ್ರ ಸೀಮಿತವಲ್ಲ:

ಹಾಗೆ ನೋಡಿದರೆ, ಈ ಅಸಮಾನತೆ ಭಾರತಕ್ಕೆ ಮಾತ್ರ ಸೀಮಿತವಾಗಿಲ್ಲ. ಜಗತ್ತಿನ ಬಹುತೇಕ ಎಲ್ಲಾ ರಾಷ್ಟ್ರಗಳಲ್ಲಿ ಕೋವಿಡ್ ಅವಧಿಯಲ್ಲಿ ಹೊಸ ಬಿಲಿಯನೆರ್‍ಗಳು ಹುಟ್ಟಿಕೊಂಡಿದ್ದಾರೆ. ವಿಶೇಷವಾಗಿ ಆರೋಗ್ಯ ಸೇವೆ, ಔಷಧ ತಯಾರಿಕೆ, ಐಟಿ ಕ್ಷೇತ್ರಗಳಲ್ಲಿ ಇರುವವರು ತಮ್ಮ ಗಳಿಕೆಯನ್ನು ಹೆಚ್ಚಿಸಿಕೊಂಡಿದ್ದಾರೆ. ಇದಕ್ಕೆ ಅಲ್ಲವೆ, ಹಿರಿಯರು ಹೇಳಿರುವುದು. ಅವರವರ ಹಣೆಬರಹ ಅವರವರಿಗೆ ಎಂದು.

https://www.youtube.com/watch?v=mJZ2A82T73k

ಈ ದೇವಾಲಯದ ದೀಪಕ್ಕೆ ನೀರೇ ಎಣ್ಣೆ

        ನಮಗೆಲ್ಲಾ ಗೊತ್ತಿರುವಂತೆ ದೇವಾಲಯಗಳಲ್ಲಿ ದೀಪ ಬೆಳಗಿಸಲು ಎಣ್ಣೆ ಅಥವಾ ತುಪ್ಪವನ್ನು ಬಳಸಲಾಗುತ್ತದೆ. ಆದರೆ, ಇಲ್ಲೊಂದು ವಿಶೇಷ ದೇವಾಲಯವಿದೆ. ಈ ದೇವಾಲಯದಲ್ಲಿ ನೀರಿನಿಂದ ಉರಿಯುತ್ತೆ ದೇವರ ದೀಪ. ಈ ದೇವಾಲಯದ ರಹಸ್ಯ ಕೇಳಿದರೆ ನಿಮಗಿದು ಮೂಢನಂಬಿಕೆ ಎನಿಸಬಹುದು. ಆದರಿದು ಮೂಢನಂಬಿಕೆಗೂ ಮೀರಿದ ರಹಸ್ಯ, ಪವಾಡ. 

ಮಧ್ಯಪ್ರದೇಶದಲ್ಲಿನ ದೇವಾಲಯವಿದು:

        "ಗಡಿಯಾಘಾಟ್ ವಾಲಿ ಮಾತಾಜಿ' ಎಂದೇ ಪ್ರಸಿದ್ಧಿಯಾಗಿರುವ ಈ ದೇವಾಲಯ ಇರುವುದು ಮಧ್ಯಪ್ರದೇಶದ ಶಾಜಾಪುರ ಜಿಲ್ಲೆಯಲ್ಲಿ. ಕಾಳಿ ಸಿಂಧ್ ನದಿಯ ದಡದಲ್ಲಿನ ಗಾಡಿಯಾ ಗ್ರಾಮದ ಬಳಿ ಈ ದೇವಾಲಯವಿದೆ. ಇದು ಭಗವತಿ ದೇವಾಲಯ. ಈ ಮಂದಿರ 'ಗಡಿಯಾಘಾಟ್ ದೇವಿ' ಎಂದೇ ಜನಪ್ರಿಯ. ಹಿಂದೆಲ್ಲಾ ಈ ದೇವಾಲಯದಲ್ಲಿ ಎಣ್ಣೆ ಹಾಕಿಯೇ ದೀಪ ಬೆಳಗಿಸಲಾಗುತ್ತಿತ್ತು. 

        ಸರಿ ಸುಮಾರು 5 ವರ್ಷಗಳ ಹಿಂದಿನ ಕಥೆಯಿದು. ಈ ದೇವಾಲಯದ ಪುರೋಹಿತರ ಕನಸಿನಲ್ಲಿ ಕಾಣಿಸಿಕೊಂಡ ದೇವಿ, ಕಾಳಿ ನದಿಯ ನೀರಿನಿಂದ ದೀಪ ಹಚ್ಚುವಂತೆ ಹೇಳಿದಳಂತೆ. ಅದರಂತೆ, ಮರುದಿನ ಮುಂಜಾನೆ ಬೇಗ ಎದ್ದು ಪುರೋಹಿತರು ಹರಿಯುವ ಕಾಳಿ ಸಿಂಧ್ ನದಿಯಿಂದ ನೀರನ್ನು ತುಂಬಿಸಿ, ದೀಪಕ್ಕೆ ಸುರಿದರಂತೆ. ಹತ್ತಿಯ ಬತ್ತಿಯನ್ನು ದೀಪದಲ್ಲಿಟ್ಟು ಬತ್ತಿಗೆ ದೀಪ ಹಚ್ಚುತ್ತಿದ್ದಂತೆ ದೀಪ ಉರಿಯಲಾರಂಭಿಸಿತಂತೆ.

        ಸುಮಾರು 15 ದಿನಗಳ ನಂತರ, ಪುರೋಹಿತರು ಗ್ರಾಮಸ್ಥರಿಗೆ ಈ ಬಗ್ಗೆ ಹೇಳಿದಾಗ, ಮೊದಲಿಗೆ ಗ್ರಾಮಸ್ಥರು ನಂಬಲಿಲ್ಲವಂತೆ. ಆದರೆ, ಎಲ್ಲರ ಸಮ್ಮುಖದಲ್ಲೇ ದೀಪಕ್ಕೆ ನೀರು ಹಾಕಿ ಬತ್ತಿಗೆ ದೀಪ ಹಚ್ಚುತ್ತಿದ್ದಂತೆ ಅದು ಉರಿಯಲು ಆರಂಭಿಸಿತಂತೆ. ಇದು ಗ್ರಾಮಸ್ಥರಿಗೂ ಅಚ್ಚರಿ ಹುಟ್ಟಿಸಿತು. ಅಂದಿನಿಂದ ಈ ದೇವಾಲಯದಲ್ಲಿ ಕಾಳಿ ಸಿಂಧ್ ನದಿಯ ನೀರಿನಿಂದ ಮಾತ್ರ ದೀಪ ಉರಿಸಲಾಗುತ್ತದೆ. ಅಂದಿನಿಂದ ಭಕ್ತರು ಈ ದೇವಾಲಯಕ್ಕೆ ಬರುವಾಗ ದೀಪಕ್ಕೆ ಎಣ್ಣೆಯನ್ನು ತರುವುದಿಲ್ಲ. ಬದಲಾಗಿ, ಕಾಳಿ ಸಿಂಧ್ ನದಿಯ ನೀರನ್ನು ತಂದು ದೇವರ ದೀಪಕ್ಕೆ ಸಮರ್ಪಿಸುತ್ತಾರೆ.

        ದೀಪಕ್ಕೆ ಈ ನೀರನ್ನು ಹಾಕಿದಾಗ ಅದು ಜಿಗುಟಾಗುತ್ತದೆ. ಬಳಿಕ, ದೀಪ ಉರಿಯಲು ಆರಂಭಿಸುತ್ತದೆ. ದೀಪದಲ್ಲಿ ಈ ನದಿಯ ನೀರನ್ನು ಸುರಿದಾಗ ಅದು ಸ್ನಿಗ್ಧತೆಯ ದ್ರವವಾಗಿ ಬದಲಾಗುವ ಕಾರಣ ದೀಪ ಉರಿಯಲು ಆರಂಭವಾಗುತ್ತದೆ ಎನ್ನುತ್ತಾರೆ ಸ್ಥಳೀಯರು. 

        ವಿಶೇಷವೆಂದರೆ, ಇಲ್ಲಿ ನೀರಿನ ದೀಪವನ್ನು ಭಗವತಿ ದೇವಸ್ಥಾನದ ಒಳಗೆ ಬೆಳಗಿದರೆ ಮಾತ್ರ ಅದು ಉರಿಯುತ್ತದೆ. ದೇವಾಲಯದ ಹೊರಗೆ ಬೆಳಗಲು ಹೋದರೆ ಅದು ಉರಿಯುವುದಿಲ್ಲ. ಅಲ್ಲದೆ, ಈ ದೀಪದ ಜ್ವಾಲೆಯಲ್ಲಿ ಸುಡುವ ನೀರು ಮಳೆಗಾಲದಲ್ಲಿ ಸುಡುವುದಿಲ್ಲ. ಅಷ್ಟಕ್ಕೂ, ಕಾಳಿ ಸಿಂಧ್ ನದಿಯ ನೀರಿನ ಮಟ್ಟ ಮಳೆಗಾಲದಲ್ಲಿ ಏರುತ್ತಿರುವುದರಿಂದ ಈ ದೇವಾಲಯ ನದಿಯ ನೀರಿನಲ್ಲಿ ಮುಳುಗಿರುತ್ತದೆ. ಇದರಿಂದಾಗಿ ಮಳೆಗಾಲದಲ್ಲಿ ಇಲ್ಲಿ ಪೂಜೆ ಮಾಡಲು ಸಾಧ್ಯವಾಗುವುದಿಲ್ಲ. 

      

 ಆದರೆ, ಶಾರ್ದಿಯಾ ನವರಾತ್ರಿಯ ಮೊದಲ ದಿನವಾದ ಘಟಸ್ಥಾಪನಾ ದಿನದಂದು ನದಿಯ ನೀರಿನಿಂದ ದೇವರ ದೀಪವನ್ನು ಮತ್ತೆ ಬೆಳಗಲಾಗುತ್ತದೆ. ನವರಾತ್ರಿಯಿಂದ ಮುಂದಿನ ವರ್ಷದ ಮಳೆಗಾಲದವರೆಗೆ ಇಲ್ಲಿ ದೀಪ ಉರಿಯುತ್ತಿರುತ್ತದೆ. 

https://www.youtube.com/watch?v=6QrVb_lrxDQ

ವಿಶ್ವದ ಅತಿ ದೊಡ್ಡ ಹಿಂದೂ ದೇವಾಲಯವಿದು

      

 ಇದು ವಿಶ್ವದ ಅತಿ ದೊಡ್ಡ ಹಿಂದೂ ದೇವಾಲಯ. ಆದರೆ, ಈ ದೇವಾಲಯ ಇರುವುದು ಭಾರತದಲ್ಲಲ್ಲ, ಬದಲಿಗೆ ಕಾಂಬೋಡಿಯಾದಲ್ಲಿ. ಅಲ್ಲದೆ, ಇದೀಗ ಇದು ಕೇವಲ ಹಿಂದೂ ದೇವಾಲಯವಾಗಿ ಮಾತ್ರ ಉಳಿದಿಲ್ಲ. ಈ ದೇವಾಲಯವನ್ನು ಬೌದ್ಧ ದೇವಾಲಯವನ್ನಾಗಿ ಪರಿವರ್ತಿಸಲಾಗಿದ್ದು, ಹಿಂದೂ ಮತ್ತು ಬೌದ್ಧ ಧರ್ಮದ ಅನುಯಾಯಿಗಳು ಈ ದೇವಾಲಯದ ಮೇಲೆ ನಂಬಿಕೆ ಇಟ್ಟುಕೊಂಡಿದ್ದಾರೆ. 

        ಭಾರತದಿಂದ ಸುಮಾರು 5 ಸಾವಿರ ಕಿ.ಮೀ. ದೂರದಲ್ಲಿರುವ ದೇಶ ಕಾಂಬೋಡಿಯಾ. ಆಗ್ನೇಯ ಏಷ್ಯಾದ ಪುಟ್ಟ ರಾಷ್ಟ್ರವಿದು. ಬಹಳ ಹಿಂದೆ ಕಾಂಬೋಡಿಯಾವನ್ನು "ಕಾಂಬೋಜಾ' ಎಂದು ಕರೆಯಲಾಗುತ್ತಿತ್ತು. ವಿಶ್ವದ ಅತಿ ದೊಡ್ಡ ಹಿಂದೂ ದೇಗುಲ ಇರುವುದು ಇದೇ ಕಾಂಬೋಡಿಯಾದಲ್ಲಿ. ಅದುವೇ ಇಲ್ಲಿನ "ಅಂಕೂರ್ ವಾಟ್' ದೇವಾಲಯ. ಒಂದು ಕಾಲದಲ್ಲಿ ಇಲ್ಲಿ ಹಿಂದೂ ಸಾಮ್ರಾಜ್ಯವಿತ್ತು ಎಂಬುದಕ್ಕೆ ಈ ದೇವಾಲಯ ಪ್ರತ್ಯಕ್ಷ ಸಾಕ್ಷಿ.

        12ನೇ ಶತಮಾನದ ಪೂರ್ವಾರ್ಧದಲ್ಲಿ (ಅಂದರೆ, 1113-1150ರಲ್ಲಿ) ಖಮೇರ್ ವಂಶದ ರಾಜ 2ನೇ ಸೂರ್ಯವರ್ಮನ್ ಈ ಭವ್ಯ ದೇಗುಲವನ್ನು ನಿರ್ಮಿಸಿದ. ಅಂದಿನ ಕಾಲದಲ್ಲಿ ಖಮೇರ್ ಸಾಮ್ರಾಜ್ಯ, ಏಷ್ಯಾದ್ಯಂತ ತನ್ನ ಪ್ರಾಬಲ್ಯವನ್ನು ಮೆರೆದಿತ್ತು. ಅಂದಿನ ಖಮೇರ್ ರಾಜವಂಶಸ್ಥರಿಗೂ, ದಕ್ಷಿಣ ಭಾರತದ ಚೋಳರಿಗೂ ನಿಕಟ ಬಾಂಧವ್ಯವಿತ್ತು. ಖಮೇರ್ ಸಾಮ್ರಾಜ್ಯದ ರಾಜಧಾನಿ ಯಶೋಧರಾಪುರದಲ್ಲಿ ಈ ದೇವಾಲಯ ನಿರ್ಮಾಣವಾಯಿತು. ಆರಂಭದಲ್ಲಿ ಇದು ಹಿಂದೂಗಳ ಆರಾಧ್ಯ ದೈವ ವಿಷ್ಣುವಿನ ದೇಗುಲವಾಗಿತ್ತು. ವಾಸ್ತವವಾಗಿ ಖಮೇರ್ ರಾಜವಂಶಸ್ಥರು ಶೈವ ಪಂಥದ ಅನುಯಾಯಿಗಳು. ಅಂದರೆ, ಶಿವನ ಭಕ್ತರಾಗಿದ್ದರು. ಆದರೆ, ಎರಡನೇ ಸೂರ್ಯವರ್ಮನ್ ಈ ದೇವಾಲಯವನ್ನು ವಿಷ್ಣುವಿಗೆ ಸಮರ್ಪಿಸಿದ. ಆರಂಭದಲ್ಲಿ ಈ ದೇವಾಲಯವನ್ನು "ವರ ವಿಷ್ಣುಲೋಕ್' ಎಂದು ಕರೆಯಲಾಗುತ್ತಿತ್ತು. ಅಲ್ಲದೆ, ಇಲ್ಲಿ ವಿಷ್ಣುವಿನ ಜತೆ ಮಹೇಶ್ವರ ಮತ್ತು ಬ್ರಹ್ಮನಿಗೂ ಪೂಜೆ ನಡೆಯುತ್ತಿತ್ತು.

        ಆದರೆ, 12ನೇ ಶತಮಾನದ ಅಂತ್ಯದಲ್ಲಿ ಇದನ್ನು ಬೌದ್ಧ ದೇವಾಲಯವನ್ನಾಗಿ ಪರಿವರ್ತಿಸಲಾಯಿತು. ಅಲ್ಲದೆ, ಯಶೋಧರಾಪುರದ ಹೆಸರು ಅಂಕೂರ್ ವಾಟ್ ಎಂದಾಯಿತು. ಸಂಸ್ಕøತದಲ್ಲಿ ಅಂಕೂರ್‍ವಾಟ್ ಎಂದರೆ ದೇವಾಲಯಗಳ ನಗರ ಎಂದರ್ಥ. ಆದಾಗ್ಯೂ, ಇಲ್ಲಿ ಹಿಂದೂ ಮತ್ತು ಬೌದ್ಧ ಧರ್ಮದ ಅನುಯಾಯಿಗಳು ಈ ದೇವಾಲಯದ ಮೇಲೆ ನಂಬಿಕೆ ಇಟ್ಟುಕೊಂಡಿದ್ದಾರೆ. ಆದರೀಗ ವಿಷ್ಣುವಿಗಿಲ್ಲಿ ನಿತ್ಯ ಪೂಜೆ ನಡೆಯುತ್ತಿಲ್ಲ.

ರಾಷ್ಟ್ರಧ್ವಜದ ಲಾಂಛನ:

        ಅಂಕೂರ್‍ವಾಟ್, ಕಾಂಬೋಡಿಯಾದ ಹೆಮ್ಮೆ, ಪ್ರತಿಷ್ಠೆಯ ಸಂಕೇತ. ಹಾಗಾಗಿಯೇ, ಆ ದೇಶ ಈ ದೇವಾಲಯದ ಫೋಟೋವನ್ನು ತನ್ನ ರಾಷ್ಟ್ರಧ್ವಜದಲ್ಲಿ ಲಾಂಛನವನ್ನಾಗಿ ಬಳಸುತ್ತಿದೆ. ಪ್ರತಿವರ್ಷ ಸುಮಾರು 2 ಮಿಲಿಯನ್ ಜನರು ಈ ದೇವಾಲಯಕ್ಕೆ ಭೇಟಿ ನೀಡುತ್ತಾರೆ. 1992ರಲ್ಲಿ ಯುನೆಸ್ಕೋ ವಿಶ್ವದ ಪಾರಂಪರಿಕ ತಾಣಗಳ ಪಟ್ಟಿಗೆ ಈ ದೇವಾಲಯವನ್ನು ಸೇರಿಸಿದೆ.

402 ಎಕರೆಯಷ್ಟು ವಿಶಾಲವ್ಯಾಪ್ತಿಯಲ್ಲಿದೆ:

        ಬರೋಬ್ಬರಿ 402 ಎಕರೆಯಷ್ಟು ವಿಶಾಲ ಪ್ರದೇಶದಲ್ಲಿ ಈ ದೇವಾಲಯ ನಿರ್ಮಾಣಗೊಂಡಿದೆ. 5 ಕಿ.ಮೀ. ಉದ್ದ ಹಾಗೂ 3 ಕಿ.ಮೀ. ಅಗಲದ ಪ್ರಾಂಗಣವನ್ನು ದೇವಾಲಯ ಹೊಂದಿದೆ. ಅಚ್ಚಹಸಿರಿನ ಅರಣ್ಯದ ನಡುವೆ, ಮೇರು ಪರ್ವತದ ಆಕೃತಿಯಲ್ಲಿ, ವಿಶಿಷ್ಟ ಶೈಲಿಯ ಖಮೇರ್ ಹಾಗೂ ದಕ್ಷಿಣ ಭಾರತೀಯ ವಾಸ್ತುಶಿಲ್ಪದಂತೆ ಈ ದೇಗುಲವನ್ನು ನಿರ್ಮಿಸಲಾಗಿದೆ. ಹಿಂದೂ ಧರ್ಮದ ಪ್ರಕಾರ, ಮೇರು ಪರ್ವತವೆಂದರೆ, ಅದು ದೇವಾನುದೇವತೆಗಳ ವಾಸಸ್ಥಾನ.

        ದೇಗುಲದ ಮುಖ್ಯ ಗೋಪುರದ ಸುತ್ತ ನಾಲ್ಕು ಉಪಗೋಪುರಗಳಿವೆ. ಮುಖ್ಯ ದೇವಾಲಯದ ಸುತ್ತ 1024 ಮೀಟರ್ ಉದ್ದ, 802 ಮೀಟರ್ ಅಗಲ, 4.5 ಮೀಟರ್ ಎತ್ತರದ ಗೋಡೆಯಿದೆ. ದೇವಾಲಯದ ಸುತ್ತ 30 ಮೀಟರ್‍ಗಳಷ್ಟು ವಿಶಾಲವಾದ ಜಾಗವಿದೆ. ಹಾಗೆಯೇ, ದೇವಾಲಯದ ಸುತ್ತ 190 ಮೀಟರ್ ಆಳದ ನೀರಿನ ಕಂದಕವಿದೆ. ಮೂರು ಪದರಗಳಲ್ಲಿ ಇದರ ತಳಪಾಯವಿದೆ. ಮೊದಲು ಮರಳು, ನಂತರ ಜಲ್ಲಿಕಲ್ಲು, ಅದರ ಮೇಲೆ ಮಣ್ಣು ಹಾಕಿ ತಳಪಾಯವನ್ನು ಗಟ್ಟಿ ಮಾಡಲಾಗಿದೆ. ಈ ಭವ್ಯ ದೇಗುಲ ನಿರ್ಮಿಸಲು ಬರೋಬ್ಬರಿ 37 ವರ್ಷಗಳೇ ಬೇಕಾಯಿತು. ಲಕ್ಷಕ್ಕೂ ಅಧಿಕ ಕಾರ್ಮಿಕರನ್ನು ಈ ದೇಗುಲ ನಿರ್ಮಾಣಕ್ಕೆ ಬಳಸಿಕೊಳ್ಳಲಾಯಿತು. 

      

 ಈ ದೇವಾಲಯದ ಇನ್ನೊಂದು ವಿಶೇಷವೆಂದರೆ, ಈ ದೇವಾಲಯದ ಮುಖ್ಯದ್ವಾರ ಪಶ್ಚಿಮಕ್ಕೆ ಅಭಿಮುಖವಾಗಿರುವುದು. ಪ್ರತಿನಿತ್ಯದ ಸೂಯಾಸ್ತವು ಈ ದೇವಾಲಯದ ಗರ್ಭಗುಡಿಯ ನಟ್ಟನಡುವೆ ಸಂಭವಿಸುತ್ತದೆ. ಹೀಗಾಗಿ, ಸಂಜೆ, ಸೂರ್ಯನ ತಿಳಿ ಬಿಸಿಲಿನ ರಶ್ಮಿಗಳಿಂದ ದೇವಾಲಯ ಕಂಗೊಳಿಸುವ ಮೂಲಕ, ಇನ್ನಷ್ಟು ಆಕರ್ಷಕವಾಗಿ ಕಾಣಿಸುತ್ತದೆ. ಸೂರ್ಯಾಸ್ತದ ಸಮಯದಲ್ಲಿ ಸೂರ್ಯ, ಇಲ್ಲಿನ ದೇವರಿಗೆ ತಲೆಬಾಗುವಂತೆ ಕಾಣಿಸುವ ನಯನ ಮನೋಹರ ದೃಶ್ಯ ನೋಡುಗರ ಮನಸೂರೆಗೊಳ್ಳುತ್ತದೆ. 

        ಮಹಾಭಾರತದಲ್ಲಿ ಬರುವ 56 ದೇಶ ಅಥವಾ ಪ್ರಾಂತ್ಯಗಳ ಪೈಕಿ ಕಾಂಬೋಡಿಯಾ ಕೂಡ ಒಂದಾಗಿತ್ತು ಎಂಬುದು ಇತ್ತೀಚಿನ ಅಧ್ಯಯನಗಳಲ್ಲಿ ತಿಳಿದು ಬಂದಿದೆ. ಇದೀಗ ಈ ದೇವಾಲಯ ಬೌದ್ಧ ಭಿಕ್ಷುಗಳ ಪ್ರಾರ್ಥನಾ ಮಂದಿರವಾಗಿದ್ದರೂ, ಇಲ್ಲಿರುವ ಹಲವು ವಿಗ್ರಹಗಳು ಹಾಗೂ ಇಲ್ಲಿನ ಗೋಡೆಗಳ ಮೇಲಿನ ಕೆತ್ತನೆಗಳು, ಹಿಂದೂ ಮೂರ್ತಿಗಳನ್ನು ಹಾಗೂ ಪುರಾಣಗಳನ್ನು ಬಿಂಬಿಸುತ್ತವೆ. 

ಗುಪ್ತನಿಧಿ ಇದೆಯೇ?

        ಖಮೇರ್ ರಾಜವಂಶಸ್ಥರ ವೈಭವ, ಸಿರಿವಂತಿಕೆಗೆ ಈ ದೇಗುಲ ಪ್ರತ್ಯಕ್ಷ ಸಾಕ್ಷಿಯಾಗಿತ್ತು. ಸುಮಾರು 3 ಸಾವಿರಕ್ಕೂ ಅಧಿಕ ವರ್ಷಗಳ ಕಾಲ ತನ್ನ ಸೊಬಗಿನಿಂದ ವಿಶ್ವದ ಗಮನವನ್ನು ತನ್ನತ್ತ ಸೆಳೆದಿತ್ತು. ಆದರೆ, 15ನೇ ಶತಮಾನದಲ್ಲಿ ಖಮೇರ್ ವಂಶದ ಪತನದ ನಂತರ ಈ ದೇಗುಲದ ವೈಭವದ ದಿನಗಳು ಮರೆಯಾಗುತ್ತಾ ಬಂದವು. ಬೌದ್ಧ ಧರ್ಮದ ಪ್ರಭಾವವೂ ಇಲ್ಲಿ ಹೆಚ್ಚಾಯಿತು. ನಂತರದ ದಿನಗಳಲ್ಲಿ ಈ ದೇಗುಲದ ಮೇಲೆ ದಾಳಿಗಳೂ ನಡೆದವು. ಸುತ್ತಲೂ ಮರಗಳು ಬೆಳೆದು, ದಟ್ಟ ಕಾನನದ ನಡುವೆ ದೇಗುಲ ಮರೆಯಾಗಿ ಹೋಗಿತ್ತು. 

        ಬಳಿಕ, 19ನೇ ಶತಮಾನದ ಅಂತ್ಯದಲ್ಲಿ ಈ ದೇಗುಲ ಮತ್ತೊಮ್ಮೆ ಪ್ರವರ್ಧಮಾನಕ್ಕೆ ಬಂತು. ಈ ದೇವಾಲಯದ ಜೀಣೋದ್ಧಾರ ಕಾರ್ಯ ಕೈಗೊಂಡ ಅಲ್ಲಿನ ಸರ್ಕಾರ, ಇದನ್ನು ಐತಿಹಾಸಿಕ ತಾಣವನ್ನಾಗಿ ಪರಿವರ್ತಿಸಿತು. ಖಮೇರ್ ಸಾಮ್ರಾಜ್ಯದ ಪತನದ ನಂತರ ಅಲ್ಲಿನ ಸಿರಿ, ಸಂಪತ್ತನ್ನು ಈ ದೇಗುಲದ ಬಳಿ ಗುಪ್ತನಿಧಿಯಾಗಿ ಇರಿಸಲಾಗಿದೆ ಎಂಬ ಅನುಮಾನಗಳಿವೆ. ಆದರೆ, ದೇಗುಲಕ್ಕೆ ಹಾನಿಯಾಗಬಹುದು ಎಂಬ ಕಾರಣದಿಂದ ಅಲ್ಲಿನ ಸರ್ಕಾರ ಈ ನಿಧಿಯ ಶೋಧಕ್ಕೆ ಮುಂದಾಗಿಲ್ಲ.

https://www.youtube.com/watch?v=dcslEL-P9qQ

ಮಂಗಳನ ಅಂಗಳದಿ ಮಾನವನ ಯಾನ

      

 ಇತ್ತೀಚಿನ ದಿನಗಳಲ್ಲಿ ಸೌರವ್ಯೂಹದಲ್ಲಿ ಅತಿ ಹೆಚ್ಚು ಸುದ್ದಿಯಲ್ಲಿರುವ ಗ್ರಹವೆಂದರೆ ಅದು ಮಂಗಳಗ್ರಹ. ಚಂದ್ರನ ನಂತರ ಮಾನವನ ಕುತೂಹಲಗಳಿಗೆ ತೆರೆದುಕೊಂಡಿರುವ ಗ್ರಹವೆಂದರೆ ಅದು ಮಂಗಳ. ಮನುಜನ ಕುಲವನ್ನೇ ತನ್ನತ್ತ ಸೂಜಿಗಲ್ಲಿನಂತೆ ಸೆಳೆಯುತ್ತಿರುವ, ಕೌತುಕ, ರಹಸ್ಯಗಳನ್ನೇ ತನ್ನ ಒಡಲಾಳದಲ್ಲಿ ಬಚ್ಚಿಟ್ಟುಕೊಂಡಿರುವ ಗ್ರಹವಿದು. ಮಂಗಳನ ಅಂಗಳದಲ್ಲಿ ಅಗೆದಷ್ಟು, ಬಗೆದಷ್ಟೂ ರಹಸ್ಯಗಳು ಹೊರಬೀಳುತ್ತಲೇ ಇವೆ. ಭೂಮಿಯ ನಂತರ ವಾಸಕ್ಕೆ ಯೋಗ್ಯವಾದ ಗ್ರಹ ಎಂದರೆ ಅದು ಮಂಗಳ ಎನ್ನುತ್ತಿದ್ದಾರೆ ವಿಜ್ಞಾನಿಗಳು. ಅಷ್ಟೇ ಏಕೆ?, 1960ರಿಂದ, ಅಂದರೆ, ಕಳೆದ 60 ವರ್ಷಗಳಲ್ಲಿ ಸುಮಾರು 49ಕ್ಕೂ ಹೆಚ್ಚು ಸಂಶೋಧನಾ ಅಧ್ಯಯನಗಳು ಈ ನಿಟ್ಟಿನಲ್ಲಿ ಮಂಗಳನ ಅಂಗಳದಲ್ಲಿ ನಡೆದಿವೆ. 

ಕೆಂಪುಗ್ರಹವಿದು:

        ನಮ್ಮ ಸೌರಮಂಡಲದ ಎರಡನೆಯ ಅತಿ ಚಿಕ್ಕ ಗ್ರಹ ಮಂಗಳ. ಭೂಮಿಯ ಅರ್ಧದಷ್ಟು, ಅಂದರೆ, 6,790 ಕಿ.ಮೀ.ಗಳಷ್ಟು ವ್ಯಾಸ ಹೊಂದಿರುವ ಈ ಗ್ರಹವನ್ನು ಕೆಂಪುಗ್ರಹವೆಂದೇ ಕರೆಯಲಾಗುತ್ತದೆ. ತನ್ನ ಕಕ್ಷೆಯ ಪರಿಭ್ರಮಣಕ್ಕೆ 24 ಗಂಟೆ ತೆಗೆದುಕೊಳ್ಳುವ ಈ ಗ್ರಹಕ್ಕೆ ಸೂರ್ಯನ ಸುತ್ತ ಪ್ರದಕ್ಷಿಣೆ ಹಾಕಲು 687 ದಿನಗಳು ಬೇಕು. ಸೂರ್ಯನಿಂದ ಬರೋಬ್ಬರಿ 22 ಕೋಟಿ 80 ಲಕ್ಷ ಕಿ.ಮೀ.ಗಳಷ್ಟು ದೂರದಲ್ಲಿ, ಭೂಮಿಯಿಂದ 300 ಮಿಲಿಯನ್ ಮೈಲುಗಳಷ್ಟು ದೂರದಲ್ಲಿ ಈ ಗ್ರಹವಿದೆ. ಹೀಗಾಗಿ, ಮಂಗಳನ ದೈನಂದಿನ ಚಲನೆ ಮತ್ತು ಋತುಮಾನಗಳು ಭೂಮಿಯ ಚಲನೆ ಮತ್ತು ಋತುಮಾನಗಳನ್ನು ಹೋಲುತ್ತವೆ. ಇನ್ನು, ಮಂಗಳನ ಗುರುತ್ವಾಕರ್ಷಣ ಬಲ ಹೆಚ್ಚುತ್ತಿದ್ದು, ಇದರಿಂದಾಗಿ, ಅದರ ಸ್ವಾಭಾವಿಕ ಉಪಗ್ರಹ ವಿನಾಶಕ್ಕೆ ಒಳಗಾಗುತ್ತಿದೆ ಎನ್ನುತ್ತಾರೆ ವಿಜ್ಞಾನಿಗಳು. 

        ಭೂಮಿಯ ಸಾಂಧ್ರತೆಯ ಶೇ.1ರಷ್ಟು ವಾತಾವರಣವನ್ನು ಈ ಗ್ರಹ ಹೊಂದಿದೆ. ಮಂಗಳನ ಮೇಲ್ಮೈಯಿಂದ 37-40 ಸಾವಿರ ಅಡಿ ಎತ್ತರದ ಪ್ರದೇಶದಲ್ಲಿ ಅಟೊಮಿಕ್ ಆಕ್ಸಿಜನ್ ಪತ್ತೆಯಾಗಿದೆ. ನಾಸಾ ಸಂಶೋಧಕರು ಸೋಫಿಯಾ, ಅಂದರೆ, (Stratospheric Observatory for Infrared Astronomy) ಎಂಬ ವಾಯುಮಂಡಲ ಪರಿಶೀಲನೆಯ ತಂತ್ರಜ್ಞಾನ ಬಳಸಿ ಅಟೊಮಿಕ್ ಆಮ್ಲಜನಕವನ್ನು ಪತ್ತೆ ಹಚ್ಚಿದ್ದಾರೆ. 

        ಎರಡು ಪರಮಾಣುಗಳ ಪರಸ್ಪರ ಸಂಯೋಜನೆಯಿಂದ ಉಂಟಾಗುವ ಆಮ್ಲಜನಕ, O2, ನಾವು ಭೂಮಿಯ ಮೇಲೆ ಉಸಿರಾಡುವ ಆಮ್ಲಜನಕದ ಪ್ರಮಾಣ. ಆದರೆ, ಮಂಗಳನ ಅಂಗಳದಲ್ಲಿ ಪತ್ತೆಯಾದ ಪರಮಾಣು ಆಕ್ಸಿಜನ್, ಒಂದೇ ಪರಮಾಣುವಾಗಿದೆ. ಆದರೆ, ಮಂಗಳನಲ್ಲಿ ಆಮ್ಲಜನಕಕ್ಕಿಂತ ಇಂಗಾಲದ ಡೈ ಆಕ್ಸೈಡ್ ಪ್ರಮಾಣವೇ ಹೆಚ್ಚು. ಇದರ ಮೇಲ್ಮೈ ಕೆಂಪಾಗಿ ಕಾಣಲು ಅದರಲ್ಲಿನ ಕಬ್ಬಿಣದ ಡೈ ಆಕ್ಸೈಡ್ ಕಾರಣ. 

ಹಿಂದೆ ಇಲ್ಲಿ ನೀರಿತ್ತು:

        400 ಕೋಟಿ ವರ್ಷಗಳ ಹಿಂದೆ ಮಂಗಳನಲ್ಲಿ ನೀರಿತ್ತು. ಉಷ್ಣಾಂಶದ ಕಾರಣ ಅದು ಆವಿಯಾಗಿದೆ. ಹೀಗಾಗಿ, ಹಲವು ವರ್ಷಗಳ ಹಿಂದೆಯೇ ಇಲ್ಲಿ ನೀರು ಹುದುಗಿ ಹೋಗಿದೆ. ಮಂಗಳನ ಒಳಗೆ ಕುದಿಯುತ್ತಿದ್ದ ಲಾವಾರಸ ಮೇಲ್ಮೈಯನ್ನು ಬಿಸಿ ಮಾಡಿದೆ. ಹೀಗಾಗಿ, ಮೇಲ್ಮೈ ಕಾದ ಕಬ್ಬಿಣವಾಗಿದೆ. ಈ ಬಿಸಿಗೆ ಇಲ್ಲಿನ ಹಿಮ ಕರಗಿದೆ. ಮೇಲ್ಮೈಯಲ್ಲಿ ಹರಡಿದ್ದ ಹಿಮ 2 ಕಿ.ಮೀ. ದಪ್ಪವಾಗಿತ್ತು ಎನ್ನುತ್ತಾರೆ ವಿಜ್ಞಾನಿಗಳು. ಮಂಗಳನ ಮೇಲ್ಮೈ ಮೇಲೆ ಹೆಮಟೈಟ್ ಹಾಗೂ ಜಿಯೋತೈಟ್ ಖನಿಜಗಳು ಕಂಡು ಬಂದಿದ್ದು, ಇವು ನೀರಿನ ಉಪಸ್ಥಿತಿಯಲ್ಲಿ ಮಾತ್ರ ಕಂಡು ಬರುತ್ತವೆ. 

        ಈ ಮಧ್ಯೆ, ಮಂಗಳನಲ್ಲಿ ಏಲಿಯನ್ ಕುರಿತ ಕುರುಹುಗಳು, ಪಿಸ್ತೂಲ್ ಮಾದರಿಯ ವಸ್ತುಗಳು, ಬಂಡೆಕಲ್ಲುಗಳ ಮಧ್ಯೆ ಕಿತ್ತಳೆ ಬಣ್ಣದ ಇಲಿಯನ್ನೇ ಹೋಲುವ ಆಕೃತಿಗಳು ಪತ್ತೆಯಾಗಿವೆ. ಅಷ್ಟೇ ಅಲ್ಲ, 10 ವಿಧದ ತರಕಾರಿಗಳನ್ನೂ ಸಹ ವಿಜ್ಞಾನಿಗಳು ಇಲ್ಲಿ ಬೆಳೆದಿದ್ದಾರೆ.

ಜೀವಿಗಳ ಪತ್ತೆಗೆ ಬಳಕೆಯಾಗುತ್ತಿದೆ ರಾಮನ್ ಎಫೆಕ್ಟ್:

        ಭಾರತ, ಅಮೆರಿಕ, ಬ್ರಿಟನ್, ರಷ್ಯಾ, ಚೀನಾ ಸೇರಿದಂತೆ ಹಲವು ರಾಷ್ಟ್ರಗಳು ಮಂಗಳನ ಅಂಗಳಕ್ಕೆ ದಾಳಿ ಇಟ್ಟಿವೆ. 2013ರಲ್ಲಿ ಮೊದಲ ಬಾರಿಗೆ ಭಾರತ, ಮಂಗಳನ ಅಂಗಳಕ್ಕೆ ಉಪಗ್ರಹ ಉಡಾವಣೆ ಮಾಡಿತ್ತು. ವಿಶೇಷವೆಂದರೆ, ಭೂಮಿಯ ಹೊರತಾಗಿ ಅನ್ಯ ಗ್ರಹಗಳಲ್ಲಿ ಜೀವಿಗಳಿವೆಯೇ ಎಂಬುದನ್ನು ಪತ್ತೆ ಹಚ್ಚಲು ಭಾರತದ ಸುಪ್ರಸಿದ್ಧ ವಿಜ್ಞಾನಿ ಸರ್.ಸಿ.ವಿ.ರಾಮನ್ ಆವಿಷ್ಕರಿಸಿದ ರಾಮನ್ ಎಫೆಕ್ಟ್ ಸಿದ್ಧಾಂತವನ್ನೇ ಬಳಸಿಕೊಳ್ಳಲಾಗುತ್ತಿದೆ. ಅಮೆರಿಕದ ಬಾಹ್ಯಾಕಾಶ ಸಂಸ್ಥೆ ನಾಸಾ, 2021ರ ಫೆಬ್ರವರಿಯಲ್ಲಿ ಮಂಗಳ ಗ್ರಹದ ಮೇಲೆ ಪರ್ಸೆವೇರನ್ಸ್ ರೋವರ್ ಅಂತರಿಕ್ಷ ವಾಹನವನ್ನು ಇಳಿಸಿದ್ದು, ಇದರಲ್ಲಿ ಅಳವಡಿಸಲಾದ ವಿಶೇಷ ಉಪಕರಣ ಶೆರ್ಲಾಕ್, ರಾಮನ್ ಎಫೆಕ್ಟ್ ಆಧಾರದಲ್ಲೇ ಮಂಗಳನ ಅಂಗಳದ ಮೇಲೆ ಹಿಂದೆ ಜೀವನ ಇತ್ತೇನು ಎಂಬುದನ್ನು ಪತ್ತೆ ಹಚ್ಚಲಿದೆ. ಅಷ್ಟೇ ಅಲ್ಲ, ಈ ಪರ್ಸೆವೆರೆನ್ಸ್ ರೋವರ್‍ನ್ನು ಮಂಗಳನ ಕಕ್ಷೆಗೆ ಯಶಸ್ವಿಯಾಗಿ ಇಳಿಸಿದ ನಾಸಾ ವಿಜ್ಞಾನಿಗಳ ತಂಡದ ನೇತೃತ್ವವನ್ನು ವಹಿಸಿದ್ದು, ಕನ್ನಡನಾಡಿನ ಕುವರಿ ಸ್ವಾತಿ ಮೋಹನ್ ಎಂಬುದು ಮತ್ತೊಂದು ಹೆಮ್ಮೆಯ ಸಂಗತಿ.

        1997ರಲ್ಲಿ ನಾಸಾ ಉಡಾಯಿಸಿದ್ದ ಮೊದಲ ರೋವರ್, "ದಿ ಸೋಜರ್ನರ್' ಅಲ್ಲಿನ ಸಾಗರ ತೀರದ ಚಿತ್ರಗಳನ್ನು ರವಾನಿಸಿದೆ. ಸರಿಸುಮಾರು 300 ವರ್ಷಗಳ ಹಿಂದೆ ಉಂಟಾದ ದೊಡ್ಡ ಪ್ರವಾಹದಿಂದ ಈ ಸಾಗರ ನಿರ್ಮಾಣವಾಗಿದೆ ಎನ್ನುತ್ತಾರೆ ವಿಜ್ಞಾನಿಗಳು. ಸಾಗರ ತೀರ ಪ್ರದೇಶದಲ್ಲಿ ಕಾಣಿಸಿರುವ ಕೆಸರು ಅಥವಾ ಕಲ್ಲಿನ ತುಣುಕುಗಳಿಂದ ಈ ಪ್ರದೇಶ ದೊಡ್ಡ ಪ್ರಕೃತಿ ವಿಕೋಪಕ್ಕೆ ತುತ್ತಾಗಿತ್ತು. ನಂತರ ಈ ಸಾಗರ ಸೃಷ್ಟಿಯಾಗಿದೆ. ಅಲ್ಲಿ ಜೀವಿಗಳಿಗೆ ವಾಸಯೋಗ್ಯ ವಾತಾವರಣವಿದೆ ಎನ್ನುವ ಅಭಿಪ್ರಾಯ ವಿಜ್ಞಾನಿಗಳದು.

ಲೇಔಟ್ ನಿರ್ಮಾಣಕ್ಕೆ ಯತ್ನ:

        ಮಂಗಳನ ಅಂಗಳದಲ್ಲಿ ಮನುಷ್ಯ ವಾಸಿಸಲು ಅನುಕೂಲವಾಗುವಂತಹ ವ್ಯವಸ್ಥೆಯನ್ನು ಸುಲಭಗೊಳಿಸುವ ನಿಟ್ಟಿನಲ್ಲಿ ನಿರಂತರವಾಗಿ ಸಂಶೋಧನೆಗಳು ನಡೆಯುತ್ತಲೇ ಇವೆ. ಮುಂದಿನ ದಿನಗಳಲ್ಲಿ ಈ ಗ್ರಹದಲ್ಲಿ ಲೇಔಟ್ ನಿರ್ಮಾಣಕ್ಕೆ ಕೂಡ ಪ್ಲ್ಯಾನ್ ಮಾಡಲಾಗುತ್ತಿದೆ. 

        ಆದರೆ, ಹೆಪ್ಪುಗಟ್ಟಿರುವ ನೀರು, ಕಾಂತಕ್ಷೇತ್ರ ಇಲ್ಲದಿರುವುದು, ವಿರಳ ವಾಯುಮಂಡಲ. ಮೇಲ್ಮೈ ಮೇಲೆ ಶಾಖದ ಸಂವಹನವಾಗದೆ ಸೂರ್ಯನ ವಿಕಿರಣ ಹಾಗೂ ಉಲ್ಕೆಗಳಿಂದ ರಕ್ಷಣೆ ಸಿಗದಿರುವುದು, ನೀರನ್ನು ಜಲರೂಪದಲ್ಲಿ ಇಟ್ಟುಕೊಳ್ಳಲು ಬೇಕಾಗುವಷ್ಟು ವಾಯುವಿನ ಒತ್ತಡ ಇಲ್ಲದಿರುವುದು, ಇದರ ಒಳಭಾಗದಲ್ಲಿ ಅಗ್ನಿಪರ್ವತಗಳ ಚಟುವಟಿಕೆ ನಿಂತಿರುವುದು ಸೇರಿದಂತೆ ಹಲವು ನೈತ್ಯಾತ್ಮಕ ಸಂಗತಿಗಳು ಮಂಗಳನಲ್ಲಿ ಜೀವಿಗಳ ವಾಸಕ್ಕೆ ತೊಂದರೆಯನ್ನು ತಂದೊಡ್ಡಿವೆ. ಆದರೂ, ಈ ನಿಟ್ಟನಲ್ಲಿ ವಿಜ್ಞಾನಿಗಳು ನಡೆಸುತ್ತಿರುವ ಶ್ರಮ, ಪ್ರಯತ್ನ ಶ್ಲಾಘನೀಯ ಹಾಗೂ ಅಭಿನಂದನಾರ್ಹ.

https://www.youtube.com/watch?v=TbUqYPaXsA4

ಇಲ್ಲಿನ ಹನುಮನ ಪ್ರತಿಮೆಯಲ್ಲಿದೆ 2 ಕೋಟಿ ರಾಮನಾಮ

      

 ಇದೊಂದು ವಿಶ್ವವಿಖ್ಯಾತ ಭಗವಾನ್ ಹನುಮನ ದೇವಾಲಯ. ಇಲ್ಲಿ ಭಗವಾನ್ ರಾಮನ ರಾಮನಾಮವೇ ವಿಶಿಷ್ಟ. ಇಲ್ಲಿನ ಹನುಮನ ವಿಗ್ರಹದಲ್ಲಿದೆ 2 ಕೋಟಿ ರಾಮನಾಮ. ಅಷ್ಟೇ ಅಲ್ಲ, ಇಲ್ಲಿನ ಶ್ರೀಮಾತಾ ಭಗವತಿ ಮಂದಿರ ಕೂಡ ತನ್ನದೇ ಆದ ವೈಶಿಷ್ಟ್ಯತೆಯನ್ನು ಹೊಂದಿದೆ.

        ಈ ವಿಶಿಷ್ಟ ದೇವಾಲಯ ಇರುವುದು ಉತ್ತರ ಪ್ರದೇಶದ ಬುಲಂದ್ ಶಹರ್ ಜಿಲ್ಲೆಯ ಖುರ್ಜಾ ತಹಸೀಲ್‍ನಲ್ಲಿ. ವಾಸ್ತವವಾಗಿ ಇದು ಭಗವತಿ ದೇವಾಲಯ. ಆದರೂ, ಈ ದೇವಾಲಯ ನವದುರ್ಗಾಶಕ್ತಿ ದೇವಸ್ಥಾನವೆಂದೇ ಪ್ರಸಿದ್ಧಿಯನ್ನು ಪಡೆದಿದೆ. ಇಲ್ಲಿನ ಭಗವತಿ ದೇವಿಯ ವಿಗ್ರಹದಲ್ಲಿ ತಾಯಿ ಭವಾನಿಯ 9 ರೂಪಗಳಿವೆ. ಈ ಭವ್ಯವಾದ ವಿಗ್ರಹ ಅಷ್ಟಧಾತು ಲೋಹದಿಂದ ನಿರ್ಮಿತವಾಗಿದ್ದು, 27 ಸಂಪುಟಗಳು ಹಾಗೂ 18 ಬಾಹುಗಳನ್ನು ಹೊಂದಿದೆ. 14 ಅಡಿ ಎತ್ತರ ಹಾಗೂ 11 ಅಡಿ ಅಗಲದ ದೇವಿಯ ಭವ್ಯ ವಿಗ್ರಹವಿದು. ತಾಯಿ ಜಗದಾಂಬೆ ಇಲ್ಲಿ ರಥದ ಮೇಲೆ ಕಮಲಾಸನದ ಭಂಗಿಯಲ್ಲಿ ವಿರಾಜಮಾನಳಾಗಿದ್ದಾಳೆ. ದೇವಿಯ ಬಲಭಾಗದಲ್ಲಿ ಹನುಮಾನ್ ಹಾಗೂ ಎಡಭಾಗದಲ್ಲಿ ಭೈರೋಜಿ ವಿಗ್ರಹಗಳಿವೆ. ದೇವ ಗಣೇಶ, ಈ ರಥದ ಸಾರಥಿಯಾಗಿದ್ದಾನೆ. ಶಂಕರ, ರಥದ ಮೇಲೆ ವಿರಾಜಮಾನನಾಗಿದ್ದಾನೆ. 1993ರಲ್ಲಿಈ ದೇವಾಲಯವನ್ನು ನಿರ್ಮಿಸಲಾಯಿತು. 1995ರ ಫೆ.13ರಂದು ದೇವಾಲಯದಲ್ಲಿ ದುರ್ಗಾದೇವಿಯ ಪ್ರಾಣ ಪ್ರತಿಷ್ಠಾಪನೆ ನೆರವೇರಿತು. 

        2 ಸಾವಿರ ಚದರಡಿ ವಿಸ್ತೀರ್ಣದಲ್ಲಿ ನಿರ್ಮಿತವಾಗಿರುವ ಈ ದೇವಾಲಯ, ವಿಶಿಷ್ಟ ಶಿಲ್ಪಕಲೆಯ ಮಾದರಿಯನ್ನು ಹೊಂದಿದೆ. ದೇವಾಲಯ 30 ಅಡಿ ಎತ್ತರವಿದ್ದರೆ, ಇದರ ಶಿಖರ 60 ಅಡಿ ಎತ್ತರವಿದೆ.

        ದೇವಾಲಯದ ಪ್ರಾಕಾರದಲ್ಲಿ ಒಂದು ಸ್ತಂಭವಿದ್ದು, ಇದನ್ನು ಮನೋಕಾಮನ ಸ್ತಂಭ ಎಂದು ಕರೆಯುತ್ತಾರೆ. ಇಲ್ಲಿಗೆ ಬರುವ ಭಕ್ತರು ದೇವಾಲಯದ ಆವರಣದಲ್ಲಿರುವ ಈ ಸ್ತಂಭಕ್ಕೆ ಚುನ್ರಿಯನ್ನು ಗಂಟು ಹಾಕಿ, ದೇವಾಲಯಕ್ಕೆ 108 ಸಲ ಪ್ರದಕ್ಷಿಣೆ ಹಾಕುತ್ತಾರೆ. ಹೀಗೆ ಮಾಡಿದರೆ, ತಮ್ಮ ಇಷ್ಟಾರ್ಥ ಸಿದ್ಧಿಸುತ್ತದೆ ಎಂಬುದು ಭಕ್ತರ ನಂಬಿಕೆ. ಹೀಗಾಗಿ, ಭಕ್ತರು ತಮ್ಮ ಇಷ್ಟಾರ್ಥ ಸಿದ್ಧಿಗಾಗಿ ಇಲ್ಲಿ ಹರಕೆ ಹೊತ್ತುಕೊಳ್ಳುವುದು ಸಾಮಾನ್ಯ.

        ಬೆಳಗ್ಗೆ 4 ಗಂಟೆಗೆ ದೇವಾಲಯದ ಬಾಗಿಲನ್ನು ತೆರೆದು ದೇವಿಗೆ ಪೂಜೆ ಸಲ್ಲಿಸಲಾಗುತ್ತದೆ. 5 ಗಂಟೆಗೆ ಮಹಾಮಂಗಳಾರತಿ ನಡೆಯುತ್ತದೆ. ಮತ್ತೆ ಸಂಜೆ 4 ಗಂಟೆಗೆ ಬಾಗಿಲು ತೆರೆದು, 7 ಗಂಟೆಗೆ ಮಂಗಳಾರತಿ ನೆರವೇರಿಸಲಾಗುತ್ತದೆ. ನವರಾತ್ರಿಯಲ್ಲಿ ಇಲ್ಲಿ ನಡೆಯುವ ಪೂಜೆ ತುಂಬಾ ವಿಶಿಷ್ಟವಾದುದು. ಈ ವೇಳೆ, ಪ್ರತಿದಿನ ದೇವಿಗೆ 56 ಬಗೆಯ ಖಾದ್ಯಗಳನ್ನು ಸಮರ್ಪಿಸಲಾಗುತ್ತದೆ. ಅಷ್ಟಮಿಯ ದಿವಸ ತಾಯಿಗೆ 10 ಕ್ವಿಂಟಾಲ್‍ಗಳಷ್ಟು ಹಲ್ವವನ್ನು ನೈವೇದ್ಯವಾಗಿ ಸಮರ್ಪಿಸಲಾಗುತ್ತದೆ. 

ಇಲ್ಲಿದೆ ಹನುಮನ ವಿಗ್ರಹ:

        ಈ ದೇವಾಲಯದ ಸಂಕೀರ್ಣದ ಮೊದಲ ಅಂತಸ್ತಿನಲ್ಲಿ ಭಗವಾನ್ ಹನುಮನ ಭವ್ಯ ಮೂರ್ತಿಯಿದೆ. 16 ಅಡಿಗಳಷ್ಟು ಎತ್ತರದ ಈ ಹನುಮನ ವಿಗ್ರಹದ ಎದೆಯಲ್ಲಿ ಭಗವಾನ್ ರಾಮ, ಲಕ್ಷ್ಮಣ ಮತ್ತು ಸೀತಾಮಾತೆಯ ಮೂರ್ತಿಗಳಿವೆ. ಈ ಹನುಮನ ಮೂರ್ತಿಯಲ್ಲಿ ಎರಡು ಕೋಟಿ ರಾಮನಾಮ ಇರುವುದು ವಿಶೇಷ. ವಿಶ್ವದಲ್ಲಿಯೇ ಅತಿಹೆಚ್ಚು ರಾಮನಾಮ ಹೊಂದಿರುವ ಹನುಮನ ವಿಗ್ರಹವಿದು. 

        ಹರಿಹರ ಬಾಬಾರವರ ನೇತೃತ್ವದಲ್ಲಿ 1995ರಿಂದ 1997ರವರೆಗೆ ಈ ದೇವಾಲಯದಲ್ಲಿ ಅಹೋರಾತ್ರಿ, ಅಂದರೆ ಹಗಲು ಮತ್ತು ರಾತ್ರಿ ನಿರಂತರವಾಗಿ "ಹರೆ ರಾಮ, ಹರೆ ಕೃಷ್ಣ' ಮಂತ್ರ ಜಪಿಸಲಾಯಿತು. ಈ ಸಮಯದಲ್ಲಿ ಭಕ್ತರು ರಾಮನಾಮವನ್ನು ಬರೆದರು. ಬಳಿಕ, ಈ ಹನುಮನ ವಿಗ್ರಹವನ್ನು ನಿರ್ಮಿಸಿದಾಗ 2 ಕೋಟಿ ರಾಮನಾಮವನ್ನು ಸೇರಿಸಲಾಯಿತು ಎನ್ನುತ್ತಾರೆ ಭಕ್ತರು. ಇದಲ್ಲದೆ, ದೇವಾಲಯದ ಸಂಕೀರ್ಣದ ಬೇಸ್‍ಮೆಂಟ್‍ನಲ್ಲಿರುವ ರಾಧಾಕೃಷ್ಣ ಮಂದಿರ ಕೂಡ ಭಕ್ತರ ಮನಸೂರೆಗೊಳ್ಳುತ್ತದೆ. 

ದೆಹಲಿಯಿಂದ 80 ಕಿ.ಮೀ.ದೂರದಲ್ಲಿದೆ ಖುರ್ಜಾ:

        ರಾಷ್ಟ್ರ ರಾಜಧಾನಿ ದೆಹಲಿಯಿಂದ 80 ಕಿ.ಮೀ. ದೂರದಲ್ಲಿದೆ ಈ ಖುರ್ಜಾ. ಜಿಲ್ಲಾ ಕೇಂದ್ರ ಬುಲಂದ್ ಶಹರ್‍ನಿಂದ 25 ಕಿ.ಮೀ. ದೂರವಿದೆ. ದೆಹಲಿಯಿಂದ ಅಲಿಗಢಕ್ಕೆ ಹೋಗುವ ರಾಷ್ಟ್ರೀಯ ಹೆದ್ದಾರಿ 91ಕ್ಕೆ ಹೊಂದಿಕೊಂಡಿದ್ದು, ರೈಲು ಮತ್ತು ರಸ್ತೆಯ ಮೂಲಕ ಸುಲಭವಾಗಿ ಈ ದೇವಾಲಯಕ್ಕೆ ತೆರಳಬಹುದು. ರೈಲಿನ ಮೂಲಕ ತೆರಳುವುದಾದರೆ, ಖುರ್ಜಾ ಜಂಕ್ಷನ್‍ನಲ್ಲಿ ಇಳಿದುಕೊಳ್ಳಬೇಕು.                    ಜೀವನದಲ್ಲಿ ಒಮ್ಮೆಯಾದರೂ ಭೇಟಿ ನೀಡಲೇಬೇಕಾದ ಅತಿ ವಿಶಿಷ್ಟತೆಯ, ಶಕ್ತಿ ದೇವತೆಯ ಸನ್ನಿಧಾನವಿದು.

https://www.youtube.com/watch?v=oknoDV8uOhU

"ಮದು'ಮಯ ಜೀವನ

      

        ಮಧ್ಯಮ ವರ್ಗದ ಕುಟುಂಬದಲ್ಲಿ ಜನಿಸಿದ್ದ ಸುಮಂತನಿಗೆ ಜೀವನ ನಡೆಸುವುದಕ್ಕೇನೂ ತೊಂದರೆ ಇರಲಿಲ್ಲ. ಹಿಂದಿಲ್ಲ, ಮುಂದಿಲ್ಲ, ತಂದೆ, ತಾಯಿಗೆ ಒಬ್ಬನೇ ಮಗ. ಮನೆಯಲ್ಲಿ ಪಿತ್ರಾರ್ಜಿತವಾಗಿಯೇ ಬಂದ ಸಾಕಷ್ಟು ಆಸ್ತಿ ಇತ್ತು. ಎರಡೂವರೆ ಎಕರೆ ಅಡಿಕೆ ತೋಟ, ಎರಡು ಎಕರೆ ಗದ್ದೆ, ಅರ್ಧ ಎಕರೆಯಷ್ಟು ವ್ಯಾಪ್ತಿಯಲ್ಲಿ ಹರಡಿದ ತೆಂಗಿನ ಪ್ಲಾಟ್ ಆದಾಯಕ್ಕೆ ಬರಪೂರ ಕಾಣಿಕೆ ನೀಡುತ್ತಿದ್ದವು. ಮಲೆನಾಡಿನ, ಅಚ್ಚಹಸಿರಿನ ಹಸಿರು ತೋಪುಗಳ ನಡುವೆ ಬೀಡು ಬೀಸಾಗಿ ಕಟ್ಟಲಾದ, ವಿಶಾಲವಾದ 2 ಹಜಾರದ ಹೆಂಚಿನ ಮನೆಯದು. ಮನೆಯಲ್ಲಿ ಎಲ್ಲವೂ ಅಚ್ಚುಕಟ್ಟು, ಆಧುನಿಕ ಜೀವನ ಶೈಲಿಗೆ ಹೊಂದಿಕೆಯಾಗುವ ಎಲ್ಲಾ ಅನುಕೂಲತೆಗಳೂ ಮನೆಯಲ್ಲಿದ್ದವು. ಓಡಾಡಲು ಕಾರು, ಬೈಕ್, ಫ್ರಿಜ್, ವಾಷಿಂಗ್ ಮಷಿನ್, ಟಿವಿ, ಮೊಬೈಲ್ ನೆಟ್‍ವರ್ಕ್ ಸಂಪರ್ಕ... ಸೇರಿದಂತೆ ಯಾವ ಅನುಕೂಲಕ್ಕೂ ಕೊರತೆ ಇರಲಿಲ್ಲ. ಹಾಲು, ಮೊಸರು, ತರಕಾರಿ, ಹಣ್ಣು ಸೇರಿದಂತೆ ದಿನನಿತ್ಯ ಬೂರಿ ಭೋಜನದ ವ್ಯವಸ್ಥೆಯೇ ಇರುತ್ತಿತ್ತು.

        ಬಿ.ಕಾಂ ಪದವಿ ಮುಗಿಸಿ, ಎಂಬಿಎ ಮಾಡಿದ್ದ ಸುಮಂತ, ಬೆಂಗಳೂರಿನಲ್ಲಿ, ಬಹುರಾಷ್ಟ್ರೀಯ ಕಂಪನಿಯೊಂದರಲ್ಲಿ ಎರಡ್ಮೂರು ವರ್ಷ ನೌಕರಿ ಮಾಡಿದ್ದ. "ಸುಮಂತ, ಈ ನೌಕರಿ, ಆ ಬೆಂಗಳೂರಿನ ಜಂಜಾಟ...ಇದೆಲ್ಲಾ ನಿಂಗೆ ಯಾಕಪ್ಪ. ಮನೇಲಿ ಬೇಕಾದಷ್ಟು ಆಸ್ತಿ ಇದ್ದು. ಸಂಬಳಕ್ಕಾಗಿ ಯಾವುದೋ ಕಂಪನಿಯಲ್ಲಿ, ಅದ್ಯಾವನೋ ಕೈಕೆಳಗೆ, ಬೇರೆ ಯಾರಿಗೋಸ್ಕರನೋ ದುಡಿದ ಬದಲು, ನಿನ್ನದೇ ಮನೇಲಿ, ನೀನೇ ಯಜಮಾನನಾಗಿ ದುಡಿದು ತಿನ್ನದು ಒಳ್ಳೆದಲ್ದನ' ಎಂದು ತಂದೆ ಹೇಳಿದಾಗ, ಸುಮಂತನಿಗೂ ಹೌದು ಅನ್ನಿಸ್ತು. ಮನುಷ್ಯ, ತಾನು ಮನುಷ್ಯ ಎನ್ನುವುದನ್ನೇ ಮರೆತು, ಹಣವೇ ಬದುಕು, ಆಫೀಸೇ ಜಗತ್ತು, ಈ ದೇಹವೆಂಬುದು ಆ ದೇವ ನಿರ್ಮಿಸಿದ ಯಂತ್ರ ಎಂದುಕೊಂಡೇ ಬೆಂಗಳೂರಲ್ಲಿ ಕೆಲಸ ಮಾಡುತ್ತಾ, ಯಾಂತ್ರಿಕವಾಗಿ ಬದುಕುವುದಕ್ಕಿಂತ ಹಳ್ಳಿಯ ಸುಖಜೀವನವೇ ಲೇಸು ಎನ್ನುತ್ತಾ ಮನೆಯ ಹಾದಿ ತುಳಿದಿದ್ದ. ರಾಜನಂತೆ ಜೀವನ ಸಾಗಿಸುತ್ತಿದ್ದ.

ಸುಮಂತನಿಗೆ 26 ವರ್ಷ ತುಂಬುತ್ತಿದ್ದಂತೆ, ಮಗನಿಗೆ ಮದುವೆ ಮಾಡಲು ಹೆಣ್ಣು ಹುಡುಕತೊಡಗಿದ ಸುಮಂತನ ತಂದೆ ಗಣಪಯ್ಯ. ಸುಮಂತನಿಗೆ ಮನಸ್ಸಲ್ಲಿ ಅದೇನೋ ಪುಳಕ. ಇಷ್ಟು ದಿವಸ ಒಬ್ಬಂಟಿಯಾಗಿ, ಹಾಯಾಗಿ, ಮನಸ್ಸಿಗೆ ಬಂದಂತೆ ತಿರುಗಾಡಿಕೊಂಡು ಇರುತ್ತಿದ್ದ ತನ್ನ ಬಾಳಿಗೆ, ಹೆಣ್ಣೊಬ್ಬಳು ಬರುತ್ತಿದ್ದಾಳೆ ಎಂಬ ಯೋಚನೆಯೇ ಆಹ್ಲಾದದ ಅನುಭವ ನೀಡುತ್ತಿತ್ತು. ಬಾಳಸಂಗಾತಿಯ ಬಗ್ಗೆ ತನ್ನದೇ ಆದ ಕನಸನ್ನು ಕಾಣುತ್ತಾ ದಿನದೂಡತೊಡಗಿದ.

ದಿನಗಳು ಉರುಳತೊಡಗಿದವು. ಋತುಗಳು ಜಾರತೊಡಗಿದವು. ವರುಷಗಳು ಕಳೆದು ಹೋದವು. ಆದರೆ, ಸುಮಂತನಿಗೆ ಹೆಣ್ಣು ಕೊಡಲು ಯಾರೂ ಮುಂದೆ ಬರಲಿಲ್ಲ. ಯಾರನ್ನು ಕೇಳಿದ್ರು, "ಎಮ್ಮನೆ ಕೂಸಿಗೆ ಮಾರಾಯಾ, ಮನೇಲಿ, ಕೃಷಿ ಮಾಡಿಕೊಂಡು ಇಪ್ಪ ಮಾಣಿ ಬ್ಯಾಡ್ದಡ. ತನ್ಗೆ ಬೆಂಗ್ಳೂರಲ್ಲಿ ನೌಕರಿ ಇದ್ದವ್ನೆ ಬೇಕು' ಹೇಳ್ತು. "ನಾವೂ ತೀರಾ ಒತ್ತಾಯ ಮಾಡಲೆ ಆಗ್ತನ. ಮತೆ, ಎಮ್ಮನೆ ಕೂಸು ಹೇಳದ್ರಲ್ಲೂ ಕರೆಕ್ಟ್ ಇದ್ದಾ. ಈ ಜಮೀನು ನಂಬ್ಕಂಡು, ಈಗಿನ ಕಾಲ್ದಲ್ಲಿ ಜೀವ್ನ ಮಾಡಲೆ ಆಗ್ತನ. ಆಳ್ಗ ಸಿಗ್ತ್ವಿಲ್ಲೆ. ನಮ್ಮತ್ರ ಕೆಲ್ಸ ಮಾಡಲೆ ಆಗ್ತಿಲ್ಲೆ. ಒಟ್ನಲ್ಲಿ ನಾವು ಇಪ್ಪಷ್ಟು ದಿವ್ಸ ನೋಡ್ಕಂಡು ಹೋಪ್ದು. ಕೊನೆಗೆ ಒಂದಿವ್ಸ ಜಮೀನು ಕೊಟ್ಟಿಕ್ಕೆ ನಾವೂ ಬೆಂಗ್ಳೂರು ಬಸ್ಸ ಹತ್ತದೆಯಾ. ಮತ್ಯಂತ ಮಾಡಲೂ ಬರ್ತಿಲ್ಲೆ' ಎನ್ನುವ ಉದ್ಘಾರವೇ ಹೆಣ್ಣುಮಕ್ಕಳ ತಂದೆ-ತಾಯಿ ಬಾಯಲ್ಲಿ ಬರ್ತಿತ್ತು.

        ಸುಮಂತನಿಗೂ ನೋಡಿ, ನೋಡಿ ಬೇಸರವಾಗ್ತಾ ಬಂತು. ನೌಕರಿ ಮಾಡುತ್ತಿರುವ ತನ್ನ ವರಗೆಯ ಯುವಕರಿಗೆ ಅದಾಗಲೇ ಮದುವೆಯಾಗಿ ಮಕ್ಕಳಾದರೂ, ತನಗೆ ಕಂಕಣ ಬಲ ಕೂಡಿ ಬರದ್ದಕ್ಕೆ ಮನಸ್ಸು ನೋಯುತ್ತಿತ್ತು.

        ಅದೊಂದು ದಿನ ಸುಮಂತ, ಬೆಂಗಳೂರಿನಲ್ಲಿರುವ ತನ್ನ ಗೆಳೆಯನಿಗೆ ಪತ್ರ ಬರೆದ. "ಗೆಳೆಯಾ, ನನಗೆ ಮದುವೆಯಾಗಲೇ ಬೇಕು ಅನ್ನಿಸ್ತಾ ಇದೆ. ಹಾಗಾಗಿ, ಮತ್ತೆ ಬೆಂಗಳೂರಿಗೆ ಬಂದು, ನೌಕರಿ ಮಾಡುವ ಮನಸ್ಸು ಮಾಡುತ್ತಿದ್ದೇನೆ. ದಯವಿಟ್ಟು ಸಹಾಯ ಮಾಡು' ಎಂದು ಪತ್ರದಲ್ಲಿ ತಿಳಿಸಿದ. "ಏ ಅದಕ್ಕೇನಂತೆ, ಬಾ, ಗೆಳೆಯಾ, ಬೆಂಗಳೂರಲ್ಲಿ ಊರವರಿಗಿಂತ ಪರ ಊರಿನವರೇ ಹೆಚ್ಚು ಎಂಬುದು ನಿನಗೆ ಗೊತ್ತಲ್ಲ. ಇಲ್ಲಿ ಬಂದರೆ, ಬದುಕು ಕಷ್ಟವಾಗಬಹುದು. ಆದರೆ, ನೌಕರಿಯೂ ಸಿಗುತ್ತೆ, ಹೆಣ್ಣು ಮಕ್ಕಳ ಮನಸ್ಸೂ ನಿನ್ನತ್ತ ಒಲಿಯುತ್ತೆ' ಎನ್ನುತ್ತಾ ಗೆಳೆಯನನ್ನು ಆಹ್ವಾನಿಸಿದ.

        ಮರುದಿನವೇ ಸುಮಂತ ಬೆಂಗಳೂರಿನ ಬಸ್ಸು ಹತ್ತಿದ. "ಮದುವೆ ಮಾಡ್ಕಂಡು, ಮನಿಗೆ ಬತ್ನಾ ಅಪ್ಪಯ್ಯಾ' ಎನ್ನುತ್ತಾ ತಂದೆ-ತಾಯಿಗೆ ನಮಸ್ಕರಿಸಿದ. "ಇರುವುದೆಲ್ಲವ ಬಿಟ್ಟು, ಇರದುದರೆಡೆಗೆ ತುಡಿವುದೇ ಜೀವನ' ಎಂಬ ಅಡಿಗರ ಮಾತುಗಳನ್ನು ಗುನುಗುತ್ತಾ, ಬಸ್ಸಿನ ಸೀಟಿಗೆ ಒರಗಿ ನಿದ್ದೆಗೆ ಜಾರಿದ.

https://www.youtube.com/watch?v=LoPOl1v41g8