ಮಲೆನಾಡಿನ ಅತ್ಯಂತ ವಿಶಿಷ್ಟವಾದ, ಬಹಳ ರುಚಿಯಾದ, ಗರಿ, ಗರಿಯಾಗಿ ಸವಿಯಬಹುದಾದ, ಅಷ್ಟೇ ಆರೋಗ್ಯಕರವಾದ ಸಿಹಿ ತಿಂಡಿಯಿದು. ಮಲೆನಾಡಿನ ಈ ವಿಶಿಷ್ಟವಾದ ಖಾದ್ಯದ ಹೆಸರು ತೊಡೆದೇವು. ಇದೊಂದು ಮಲೆನಾಡಿನ ಸಾಂಪ್ರದಾಯಿಕ ಸಿಹಿ ತಿಂಡಿ. ಮಲೆನಾಡು ಭಾಗದಲ್ಲಿ, ಅದರಲ್ಲೂ ವಿಶೇಷವಾಗಿ ಹವ್ಯಕರ ಮನೆಗಳಲ್ಲಿ ಈ ಖಾದ್ಯವನ್ನು ಹೆಚ್ಚಾಗಿ ಮಾಡುತ್ತಾರೆ. ಹಿಂದೆಲ್ಲಾ ಸಾಧಾರಣವಾಗಿ ಕಬ್ಬು ಕಡಿದು, ಆಲೆಮನೆ ನಡೆಯುವಾಗ ಈ ತಿಂಡಿಯನ್ನು ಮಾಡುವ ಸಂಪ್ರದಾಯವಿತ್ತು. ಕಾರಣ, ಇದಕ್ಕೆ ಕಬ್ಬಿನ ಹಾಲನ್ನು ಹಾಕಿ, ಜೊತೆಗೆ ಆಗ ತಾನೆ ನೊರೆ ಬಂದ ಬೆಲ್ಲವನ್ನು ಹಾಕಿ ಮಾಡಿದರೆ, ಅದರ ರುಚಿಯೇ ಬೇರೆ. ಆದರೆ, ಬರ ಬರುತ್ತಾ ಕಬ್ಬು ಬೆಳೆಯುವುದು ಕಡಿಮೆಯಾಗಿ, ಆಲೆಮನೆಗಳ ಸಂಖ್ಯೆ ಕಡಿಮೆಯಾದಂತೆ ಬರಿ ಬೆಲ್ಲವನ್ನು ಮಾತ್ರ ಹಾಕಿ ಇದನ್ನು ಮಾಡಲಿಕ್ಕೆ ಆರಂಭಿಸಿದ್ದಾರೆ. ಯಾವಾಗ ಬೇಕಾದರೂ ಇದನ್ನು ಮಾಡಬಹುದು.
ತೊಡೆದೇವಿಗೆ ಬೇಕಾದ ಸಾಮಗ್ರಿಗಳು:
ಅಕ್ಕಿ, ಅರಿಶಿನ, ಕಬ್ಬಿನ ಹಾಲು, ಇಲ್ಲದಿದ್ದರೆ ಬರಿ ಬೆಲ್ಲ. ಬೆಲ್ಲ ಎಂದರೆ, ಮಲೆನಾಡು ಭಾಗದಲ್ಲಿ ದೊರೆಯುವ ಸಾಂಪ್ರದಾಯಿಕ ಬೆಲ್ಲ, ಶೇಂಗಾ ಎಣ್ಣೆ, ತೊಡೆದೇವು ಎರೆಯುವ ಗಡಿಗೆ, ಇದು ಸಿಗದಿದ್ದರೆ, ಮಣ್ಣಿನ ಮಡಿಕೆ, ಅಡಿಕೆ ಹಾಳೆಯ ತುಂಡು, ಇದು ಇಲ್ಲದಿದ್ದರೆ ದೋಸೆ ತೆಗೆಯುವ ಸೌಟು. ಇದಕ್ಕೆ ಗ್ಯಾಸ್‍ಒಲೆಗಿಂತ ಸೌದೆ ಒಲೆ ಬೆಸ್ಟ್.
ಮಾಡುವ ವಿಧಾನ:
ಹಿಂದಿನ ರಾತ್ರಿ ಅಕ್ಕಿಯನ್ನು ನೆನೆಸಿಡಿ. ಮರುದಿನ ಬೆಳಗ್ಗೆ ಅದನ್ನು ಮಿಕ್ಸಿಗೆ ಹಾಕಿ ನಯವಾಗಿ ರುಬ್ಬಿಕೊಳ್ಳಿ. ಅದಕ್ಕೆ ಸ್ವಲ್ಪ ಅರಿಶಿನ, ರುಚಿಗೆ ಬೇಕಿರುವಷ್ಟು ಬೆಲ್ಲ ಹಾಕಿ ದೋಸೆ ಹಿಟ್ಟಿನಂತೆ ಕದಡಿಕೊಳ್ಳಿ. ಬಳಿಕ, ಸೌದೆ ಒಲೆಯ ಮೇಲೆ ತೊಡೆದೇವು ತಯಾರಿಸಲು ಬೇಕಾದ ಅಗಲ ತಳದ ಮಣ್ಣಿನ ಗಡಿಗೆಯನ್ನು ಶುಚಿಯಾಗಿ ತೊಳೆದುಕೊಂಡು, ತಲೆಕೆಳಗಾಗಿ ಇಡಿ. ಮಡಿಕೆಯ ಮೇಲೆ ದೋಸೆ ಬಂಡಿಗೆ ಎಣ್ಣೆ ಸವರಿದಂತೆ ಶೇಂಗಾ ಎಣ್ಣೆಯನ್ನು ಸವರಿ. ಮಡಿಕೆ ಕಾದ ನಂತರ ತೆಳ್ಳನೆಯ ಹಿಟ್ಟನ್ನು ಒಂದು ಬಟ್ಟಲಿಗೆ ಹಾಕಿಕೊಳ್ಳಿ.
ನಂತರ, ಆಯತಾಕಾರದ ಶುದ್ಧವಾದ ಬಿಳಿ ಬಟ್ಟೆಯನ್ನು ಚಿಕ್ಕ ಮರದ ಕೋಲೊಂದಕ್ಕೆ ಸುತ್ತಿ ಬಿಗಿಗೊಳಿಸಿಕೊಳ್ಳಿ. ಈಗ ಈ ಬಟ್ಟೆಯನ್ನು ಬಟ್ಟಲಿನಲ್ಲಿ ತಯಾರಿಸಿಕೊಂಡ ಹಿಟ್ಟಿನಲ್ಲಿ ಅದ್ದಿ, ಹದವಾಗಿ ಕಾದ ಗಡಿಗೆಯ ಮೇಲೆ ಪ್ಲಸ್ ಆಕಾರದಲ್ಲಿ ಎಳೆಯಿರಿ. ನಂತರ, ಗರಿಯಾದ ತೊಡೆದೇವನ್ನು ಒಣಗಿದ ಅಡಿಕೆ ಹಾಳೆಯಿಂದ ಅಥವಾ ದೋಸೆ ತೆಗೆಯುವ ಸೌಟಿನಿಂದ ನಿಧಾನವಾಗಿ ದೋಸೆಯನ್ನು ತೆಗೆದ ಹಾಗೆ ತೆಗೆಯಿರಿ. ನಂತರ, ತ್ರಿಕೋನಾಕಾರದಲ್ಲಿ ಮಡಿಚಿಡಿ. ಇದಕ್ಕೆ ತುಪ್ಪ ಅಥವಾ ಹಾಲನ್ನು ಹಾಕಿಕೊಂಡು ಸವಿಯಬಹುದು.
ನಾವು ಈವತ್ತು ಮೇ ತಿಂಗಳಲ್ಲಿ ಕುಂಭ ಮತ್ತು ಮಕರ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ. ಮೇ ತಿಂಗಳಲ್ಲಿನ ಗೋಚಾರ ಫಲ, ಅಂದರೆ, ಯಾವ ರಾಶಿಯಲ್ಲಿ ಯಾವ ಗ್ರಹದ ಸಂಚಾರವಿದೆ, ಗ್ರಹಗಳ ಸ್ಥಾನಪಲ್ಲಟ, ಅದರಿಂದ ಆ ಎರಡೂ ರಾಶಿಗಳ ಮೇಲೆ ಆಗುವಂತಹ ಪರಿಣಾಮಗಳು ಮತ್ತು ಗ್ರಹದೋಷಗಳ ನಿವಾರಣೆಗೆ ಇರುವಂತಹ ಪರಿಹಾರ ಕ್ರಮಗಳ ಬಗ್ಗೆ ನೋಡೋಣ.
ಕುಂಭ ರಾಶಿ
ಮಕರ ಮತ್ತು ಕುಂಭ, ಈ ಎರಡೂ ರಾಶಿಗಳಿಗೆ ಅಧಿಪತಿ ಶನಿ. ಕುಂಭ ರಾಶಿಯವರಿಗೆ ಈಗಾಗಲೇ ಸಾಡೇಸಾತ್ ಆರಂಭವಾಗಿದ್ದು, ಶನಿ ವ್ಯಯ ಸ್ಥಾನದಲ್ಲಿದ್ದಾನೆ. ಹೀಗಾಗಿ, ವ್ಯಯಸ್ಥಾನದಲ್ಲಿರುವ ಸಾಡೇಸಾತ್ ಶನಿ, ಸಾಧಾರಣವಾಗಿ ಕಷ್ಟವನ್ನೇ ನೀಡುತ್ತಾನೆ. ಆದರೆ, ಕುಂಭ ರಾಶಿ, ಶನಿಗೆ ಸ್ವಕ್ಷೇತ್ರ ಹಾಗೂ ಮೂಲ ತ್ರಿಕೋಣ ರಾಶಿಯಾಗಿರುವುದರಿಂದ, ಆತ ಶುಭ ಫಲ ನೀಡುವ ಸಾಧ್ಯತೆ ಇದೆ. ಈ ಮಧ್ಯೆ, ಮೇ 23ರಂದು ಶನಿಯ ವಕ್ರಗತಿ, ಅಂದರೆ, ಹಿಮ್ಮುಖ ಚಲನೆ ಆರಂಭವಾಗಲಿದೆ. ಹೀಗಾಗಿ, ಮಾನಸಿಕವಾಗಿ ನಿಮಗೆ ಕಿರಿ ಕಿರಿ ಹೆಚ್ಚಬಹುದು. ಅನಾರೋಗ್ಯ ನಿಮ್ಮನ್ನು ಕಾಡಬಹುದು. ಉದ್ಯೋಗಸ್ಥರಿಗೆ, ಸರಕಾರಿ ನೌಕರಿಯಲ್ಲಿ ಇರುವವರಿಗೆ ಮೇಲಾಧಿಕಾರಿಗಳಿಂದ ಕಿರಿಕಿರಿ ಉಂಟಾಗಬಹುದು. ಅಪವಾದ, ಅಪಕೀರ್ತಿಗಳು ನಿಮ್ಮ ಮಾನಸಿಕ ನೆಮ್ಮದಿಯನ್ನು ಹಾಳು ಮಾಡಬಹುದು.
ಇನ್ನು, ಗುರು, ನಿಮ್ಮ ಜನ್ಮರಾಶಿಯಲ್ಲಿಯೇ ಇದ್ದರೂ, ನಿಮಗೆ ಗುರುಬಲವಿಲ್ಲ. ಆದರೂ, ಶುಭಗ್ರಹನಾಗಿರುವ ಗುರುವಿನ ಅನುಗ್ರಹ ನಿಮಗೆ ಇರಲಿದೆ. ಕುಟುಂಬದಲ್ಲಿ, ಕುಟುಂಬದ ಹೊರಗೆ ಮನಸ್ತಾಪಗಳು ಬರುವ ಸಂಭವ ಇದೆ. ಕುಟುಂಬದ ಹಿರಿಯರ ಆರೋಗ್ಯದಲ್ಲಿ ವ್ಯತ್ಯಾಸ ಕಂಡು ಬರುವ ಸಾಧ್ಯತೆಯಿದೆ. ಹಣಕಾಸಿನ ಅಡಚಣೆ ಎದುರಾಗಬಹುದು. ಪಿತ್ರಾರ್ಜಿತ ಆಸ್ತಿಯ ವಿಚಾರದಲ್ಲಿ ಅನಾವಶ್ಯಕವಾಗಿ ವಿವಾದ ಆಗಬಹುದು. ಜ್ವರಬಾಧೆ ನಿಮ್ಮನ್ನು ಕಾಡಬಹುದು. ಮೇ 14ರವರೆಗೆ ಭೂಮಿ-ಸ್ಥಿರಾಸ್ತಿ ವ್ಯವಹಾರಗಳಿಂದ, ಸಹೋದರ ವರ್ಗದಿಂದ ನಿಮಗೆ ಅನುಕೂಲವಿದೆ.
ಮೇ 4ರಂದು ಶುಕ್ರ, ವೃಷಭ ರಾಶಿ ಪ್ರವೇಶಿಸಲಿದ್ದು, ಮೇ 28ರವರೆಗೂ ಇಲ್ಲಿಯೇ ಇರಲಿದ್ದಾನೆ. ತನ್ನದೇ ಆಧಿಪತ್ಯದ ಉಚ್ಛಸ್ಥಾನದಲ್ಲಿರುವ ಶುಕ್ರ, ನಿಮಗೆ ಶುಭಫಲಗಳನ್ನು ನೀಡಲಿದ್ದಾನೆ. ಇನ್ನು, ಮೇ 26ರವರೆಗೆ ಬುಧ ಕೂಡ ಇದೇ ರಾಶಿಯಲ್ಲಿ ಇರಲಿದ್ದಾನೆ. ಶುಕ್ರ ಹಾಗೂ ಬುಧ, ನೈಸರ್ಗಿಕವಾಗಿ ಮಿತ್ರಗೃಹಗಳಾಗಿದ್ದು, ಇವುಗಳ ಯುತಿ ಶುಭ ಫಲವನ್ನೇ ನೀಡಲಿದೆ.
ಇನ್ನು, ಕುಜ, 5ನೇ ಮನೆಯಲ್ಲಿದ್ದಾನೆ. ಪಂಚಮಾಧಿಪತಿ ಬುಧನಿಗೂ, ಕುಜನಿಗೂ ನೈಸರ್ಗಿಕವಾಗಿ ಶತ್ರುತ್ವವಿದ್ದು, ಆತನಿಂದ ಶುಭಫಲ ನಿರೀಕ್ಷಿಸುವಂತಿಲ್ಲ. ಹೀಗಾಗಿ, ಶತ್ರುಗಳ ಕಾಟ, ಕೈ ಹಿಡಿದ ಕೆಲಸಗಳಲ್ಲಿ ಅಪಜಯ ಕಂಡು ಬರಬಹುದು. ಇನ್ನು, ಚತುರ್ಥದ ರಾಹು, ಮನಸ್ಸಿನಲ್ಲಿ ಋಣಾತ್ಮಕವಾದ ಚಿಂತನೆಗಳನ್ನು ವೃದ್ಧಿಗೊಳಿಸುವುದರಿಂದ ಹಾಗೂ ಕರ್ಮಭಾವದಲ್ಲಿ, ಅಂದರೆ 10ನೇ ಮನೆಯಲ್ಲಿರುವ ಕೇತುವಿನಿಂದ ನಿಮ್ಮಲ್ಲಿ ಕಲಹ ಪ್ರವೃತ್ತಿ ಹೆಚ್ಚಬಹುದು.
ಹೀಗಾಗಿ, ಮೃತ್ಯುಂಜಯ ಜಪ, ವಿಷ್ಣು ಸಹಸ್ರನಾಮಾರ್ಚನೆ, ಅಶ್ವತ್ಥ ಪ್ರದಕ್ಷಿಣೆ ಮಾಡಿ. ಶನಿವಾರದಂದು ಶನಿಯ ಆರಾಧನೆಯಿಂದ ನಿಮ್ಮ ಸಂಕಷ್ಟ ದೂರವಾಗಿ ನಿಮಗೆ ಒಳಿತಾಗಲಿದೆ. ಹಿಡಿದ ಕಾರ್ಯದಲ್ಲಿ ಜಯ ಸಿಗಲಿದೆ.
ಒಟ್ಟಿನಲ್ಲಿ ಈ ತಿಂಗಳು ನಿಮಗೆ ಮಿಶ್ರಫಲದಾಯಕ ಎನ್ನಬಹುದು. ಬುಧವಾರ ಹಾಗೂ ಶುಕ್ರವಾರಗಳು ನಿಮಗೆ ಶುಭವಾರ. ನಿಮ್ಮ ರಾಶಿಯ ಅದೃಷ್ಟ ಸಂಖ್ಯೆ 2 ಮತ್ತು 7.
ಮಕರ ರಾಶಿ:
ಇನ್ನು, ಮಕರ ರಾಶಿಯನ್ನು ನೋಡುವುದಾದರೆ, ರಾಶಿಯ ಅಧಿಪತಿಯಾಗಿರುವ ಶನಿ, ನಿಮ್ಮ ರಾಶಿಯಲ್ಲಿಯೇ ಇದ್ದಾನೆ. ನಿಮಗೆ ಈಗಾಗಲೇ ಸಾಡೇಸಾತಿ ಆರಂಭವಾಗಿದ್ದು, ಸಾಡೇಸಾತ್ ಶನಿ ಸಾಧಾರಣವಾಗಿ ಕಷ್ಟವನ್ನೇ ನೀಡುತ್ತಾನೆ. ಆದರೆ, ಶನಿಗೆ ಇದು ಸ್ವಕ್ಷೇತ್ರ ಆಗಿರುವುದರಿಂದ ಅಷ್ಟೊಂದು ಕಷ್ಟ ನೀಡಲಾರ. ಈ ಮಧ್ಯೆ, ಮೇ 23ರಂದು ಶನಿಯ ವಕ್ರಗತಿ, ಅಂದರೆ, ಹಿಮ್ಮುಖ ಚಲನೆ ಆರಂಭವಾಗಲಿದೆ.
ಹೀಗಾಗಿ, ಮಾನಸಿಕವಾಗಿ ಕಿರಿ ಕಿರಿ ಹೆಚ್ಚಬಹುದು. ಅನಾರೋಗ್ಯ ನಿಮ್ಮನ್ನು ಕಾಡಬಹುದು. ಉದ್ಯೋಗಸ್ಥರಿಗೆ, ಸರಕಾರಿ ನೌಕರಿಯಲ್ಲಿ ಇರುವವರಿಗೆ ಮೇಲಾಧಿಕಾರಿಗಳಿಂದ ಕಿರಿಕಿರಿ ಉಂಟಾಗಬಹುದು. ಅಪವಾದ, ಅಪಕೀರ್ತಿಗಳು ನಿಮ್ಮ ಮಾನಸಿಕ ನೆಮ್ಮದಿಯನ್ನು ಹಾಳು ಮಾಡಬಹುದು. ಉದ್ಯೋಗದಲ್ಲಿ ನಿಮ್ಮ ಸ್ಥಾನಕ್ಕೆ ಚ್ಯುತಿ ಬರಬಹುದು. ಹಣಕಾಸಿನ ಅಡಚಣೆ ಉಂಟಾಗಬಹುದು.
ಇನ್ನು, ಗುರು ದ್ವಿತೀಯ ಭಾವದಲ್ಲಿದ್ದು, ಶುಭದಾಯಕನಾಗಿದ್ದಾನೆ. ನಿಮಗೆ ಈ ತಿಂಗಳು ಗುರುಬಲವಿದೆ. ಕುಟುಂಬದಲ್ಲಿ ಅಭಿವೃದ್ಧಿ, ನೆಮ್ಮದಿಯ ವಾತಾವರಣ ಕಂಡು ಬರಲಿದೆ. ಮನೆಯಲ್ಲಿ ಶುಭಕಾರ್ಯಗಳು ನಡೆಯಲಿವೆ. ಪಿತ್ರಾರ್ಜಿತ ಆಸ್ತಿಯ ಲಾಭವಿದೆ. ಸಮಾಜದಲ್ಲಿ ನಿಮಗೆ ಗೌರವದ ಸ್ಥಾನಮಾನಗಳು ಲಭಿಸಲಿವೆ.
ಶುಕ್ರ, ಮೇ 4ರಂದು ತನ್ನದೇ ಆದಿಪತ್ಯದ ಇನ್ನೊಂದು ರಾಶಿಯಾಗಿರುವ ವೃಷಭಕ್ಕೆ ಬರಲಿದ್ದು, ಮೇ 28ರವರೆಗೂ ವೃಷಭದಲ್ಲಿಯೇ ಇರಲಿದ್ದಾನೆ. ತನ್ನದೇ ಆಧಿಪತ್ಯದ ಉಚ್ಛಸ್ಥಾನದಲ್ಲಿರುವ ಶುಕ್ರ, ನಿಮಗೆ ಶುಭಫಲಗಳನ್ನೇ ನೀಡಲಿದ್ದಾನೆ. ಅವಿವಾಹಿತರಿಗೆ ವಿವಾಹ ಯೋಗ ಕೂಡಿ ಬರಲಿದೆ. ಇನ್ನು, ಮೇ 26ರಂದು ಬುಧ, ವೃಷಭ ರಾಶಿಯಿಂದ ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದು, ನಿಮಗೆ ಶುಭಫಲ ನೀಡಲಿದ್ದಾನೆ.
ಇನ್ನು, 6ನೇ ಮನೆಯಲ್ಲಿ ಇರುವ ಕುಜ, ಅನುಕೂಲನಾಗಿದ್ದು, ಕೆಲಸದಲ್ಲಿ ಮುಂಬಡ್ತಿ, ಸಂಬಳದಲ್ಲಿ ಏರಿಕೆ, ಉತ್ತಮ ಸ್ಥಾನಕ್ಕೆ ವರ್ಗಾವಣೆ ಸಿಗುವ ಸಾಧ್ಯತೆ ಇದೆ. 11ನೇ ಮನೆಯಲ್ಲಿ ಇರುವ ಕೇತುವಿನಿಂದಾಗಿ ನಿಮ್ಮ ಕೆಲಸಗಳಲ್ಲಿ ನಿಮಗೆ ಜಯ ಸಿಗಲಿದೆ.
ಆದರೆ, 5ನೇ ಮನೆಯಲ್ಲಿ ಇರುವ ರಾಹು ಮಾನಸಿಕ ಕಿರಿಕಿರಿ ಉಂಟು ಮಾಡಲಿದ್ದಾನೆ. ಇನ್ನು, ಮೇ14 ರಂದು ರವಿ, ವೃಷಭ ರಾಶಿಯನ್ನು ಪ್ರವೇಶಿಸಲಿದ್ದು, ಸ್ವಲ್ಪ ಮಟ್ಟಿನ ಅನಾರೋಗ್ಯ ನಿಮ್ಮನ್ನು ಕಾಡಬಹುದು.
ಹೀಗಾಗಿ, ಸಂಕಷ್ಟ ಪರಿಹಾರಕ್ಕಾಗಿ ಶನಿಶಾಂತಿ, ನವಗ್ರಹಶಾಂತಿ, ಜನ್ಮನಕ್ಷತ್ರದಂದು ಶಿವನಿಗೆ ರುದ್ರಾಭಿಷೇಕ ಮಾಡಿಸುವುದು ಒಳ್ಳೆಯದು. ವೆಂಕಟೇಶ್ವರನ ಆರಾಧನೆಯಿಂದ ಸುಖ ಶಾಂತಿ ದೊರಕಲಿದೆ. ಒಟ್ಟಿನಲ್ಲಿ ಮೇ ತಿಂಗಳಲ್ಲಿ ನಿಮಗೆ ಶುಭವೇ ಜಾಸ್ತಿ.
ಶುಕ್ರವಾರ ಮತ್ತು ಬುಧವಾರಗಳು ಶುಭವಾರಗಳು. ನಿಮ್ಮ ರಾಶಿಯ ಅದೃಷ್ಟ ಸಂಖ್ಯೆ 5 ಮತ್ತು 6.
ನಾವು ಈವತ್ತು ಮೇ ತಿಂಗಳಲ್ಲಿ ಧನು ಮತ್ತು ಮೀನ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ.
ಧನು ರಾಶಿ
ಧನು ಮತ್ತು ಮೀನ, ಈ ಎರಡೂ ರಾಶಿಗಳಿಗೆ ಅಧಿಪತಿ ಗುರು. ಅಷ್ಟೇ ಅಲ್ಲ, ಮೀನ ರಾಶಿ, ಕೇತುವಿಗೆ ಸ್ವಕ್ಷೇತ್ರ ಕೂಡ. ಇನ್ನು, ನಿಮ್ಮ ಜನ್ಮರಾಶಿಯಿಂದ ತೃತೀಯ ಭಾವದಲ್ಲಿರುವ ಗುರು, ನಿಮಗೆ ಅನುಕೂಲಕರನಾಗಿಲ್ಲ. ಜೊತೆಗೆ, ಸಾಡೇಸಾತ್ ಶನಿ, ಕೊನೆಯ ಘಟ್ಟದಲ್ಲಿ ಇರುವುದರಿಂದ ಶನಿ ಕೂಡ ನಿಮಗೆ ಹೆಚ್ಚು ಕಷ್ಟಗಳನ್ನೇ ನೀಡುತ್ತಾನೆ. ಹೀಗಾಗಿ, ಕೆಲಸ-ಕಾರ್ಯಗಳಲ್ಲಿ ವಿಘ್ನ ಎದುರಾಗಬಹುದು. ನಂಬಿದವರಿಂದಲೇ ಮೋಸ ಹೋಗುವ ಸಾಧ್ಯತೆಯಿದೆ. ಮನೆಯಲ್ಲಿ, ಬಂಧುಗಳ ಜೊತೆ, ಮಿತ್ರರೊಂದಿಗೆ ಕಲಹ, ಉದ್ಯೋಗದಲ್ಲಿ ಕಿರಿಕಿರಿ ಉಂಟಾಗಬಹುದು. ಆರ್ಥಿಕವಾಗಿ ಸಂಕಷ್ಟ ಎದುರಾಗಲಿದೆ. ಅನಾರೋಗ್ಯ ನಿಮ್ಮನ್ನು ಕಾಡಬಹುದು. ಹಣಕಾಸಿನ ವಿಷಯವಾಗಿ ಅವಮಾನ ಅನುಭವಿಸುವ ಸಾಧ್ಯತೆ ಕೂಡ ಇದೆ. ವಾಸಸ್ಥಳದ ಬದಲಾವಣೆ ಸಾಧ್ಯತೆಯಿದೆ. ವಾಹನ ಚಲಾಯಿಸುವಾಗ ಎಚ್ಚರಿಕೆ ಅಗತ್ಯ.
ಇನ್ನು, ಸಪ್ತಮ ಭಾವದಲ್ಲಿರುವ ಕುಜ, ವ್ಯಯ ಭಾವದಲ್ಲಿರುವ ಕೇತು ಕೂಡ ನಿಮಗೆ ಅನುಕೂಲಕರನಾಗಿಲ್ಲ. ಹೀಗಾಗಿ, ನಿಮ್ಮ ದಾಂಪತ್ಯದಲ್ಲಿ ವಿರಸ ಉಂಟಾಗಬಹುದು.
ಆದರೆ, 6ನೇ ಮನೆಯಲ್ಲಿ ಇರುವ ಬುಧ ಹಾಗೂ ರಾಹುಗಳು ನಿಮಗೆ ಸುಖ ನೀಡಲಿದ್ದು, ಧನಲಾಭವಾಗುವ ಸಾಧ್ಯತೆಯಿದೆ.
ಸಂಕಷ್ಟ ನಿವಾರಣೆಗಾಗಿ ಗ್ರಹಶಾಂತಿ ಮಾಡಿಸಿ. ಕುಲದೇವತೆಯ ಪ್ರಾರ್ಥನೆ ಮಾಡಿ. ಮೃತ್ಯುಂಜಯ ಜಪ ಮಾಡುವುದರಿಂದ, ಸೋಮವಾರದಂದು ಶಿವನಿಗೆ ರುದ್ರಾಭಿಷೇಕ ನೆರವೇರಿಸುವುದರಿಂದ ಕ್ಷೇಮ ಉಂಟಾಗಲಿದೆ. ಶನಿವಾರದ ದಿನ ಒಪ್ಪತ್ತು ಮಾಡುವುದರಿಂದ, ಅಶ್ವತ್ಥ ಪ್ರದಕ್ಷಿಣೆ ಮಾಡುವುದರಿಂದ ಸಂಕಷ್ಟಗಳು ದೂರವಾಗುವುವು. ಒಟ್ಟಾರೆ ನೋಡುವುದಾದರೆ, ನಿಮಗೆ ಈ ತಿಂಗಳು ಮಿಶ್ರಫಲದಾಯಕ ಎನ್ನಬಹುದು.
ಧನು ರಾಶಿಯವರಿಗೆ ಗುರುವಾರ ಮತ್ತು ಮಂಗಳವಾರ ಶುಭವಾರ. ಅದೃಷ್ಟ ಸಂಖ್ಯೆ 3 ಮತ್ತು 9.
ಮೀನ ರಾಶಿ:
ಇನ್ನು, ಮೀನ ರಾಶಿಯನ್ನು ನೋಡುವುದಾದರೆ, ರಾಶಿಯ ಅಧಿಪತಿ ಗುರು ವ್ಯಯಸ್ಥಾನದಲ್ಲಿದ್ದು, ನಿಮಗೆ ಈ ತಿಂಗಳು ಗುರುಬಲ ಇರುವುದಿಲ್ಲ. ಹೀಗಾಗಿ, ಹಣಕಾಸಿನ ತೊಂದರೆ ಉಂಟಾಗಲಿದೆ. ಆದಾಯಕ್ಕಿಂತ ಖರ್ಚು ಜಾಸ್ತಿಯಾಗಲಿದೆ. ಅನಾವಶ್ಯಕ ಸಂಚಾರದಿಂದ ದೇಹಕ್ಕೆ ಆಯಾಸ, ಅನಾರೋಗ್ಯದ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ಮನಸ್ಸಿಗೆ ಅಶಾಂತಿ, ಶತ್ರುಗಳ ಕಾಟ ಎದುರಾಗಬಹುದು. ಯತ್ನಿಸಿದ ಕಾರ್ಯಗಳಲ್ಲಿ ವಿಘ್ನ ಎದುರಾಗಬಹುದು.
ಆದರೆ, ಲಾಭಭಾವದಲ್ಲಿ ಇರುವ ಶನಿ ಶುಭಫಲ ನೀಡಲಿದ್ದಾನೆ. ಉದ್ಯೋಗ, ವ್ಯಾಪಾರ, ವ್ಯವಹಾರಗಳಲ್ಲಿ ಅಭಿವೃದ್ಧಿ ಕಂಡು ಬರಲಿದೆ. ಭೂಮಿ, ವಾಹನ ಖರೀದಿಯ ಯೋಗವಿದೆ. ಧನಲಾಭವಿದೆ. ಇನ್ನು ತೃತೀಯ ಭಾವದಲ್ಲಿರುವ ಶುಕ್ರ ಹಾಗೂ ರಾಹುವಿನಿಂದ ಸಮಾಜದಲ್ಲಿ ನಿಮ್ಮ ಘನತೆ, ಗೌರವಗಳು ವೃದ್ಧಿಸಲಿವೆ. ಬಂಧುಗಳ ಸಹಾಯ ದೊರಕಲಿದೆ. ಇನ್ನು, ಮೇ14 ರಂದು ರವಿ, ವೃಷಭ ರಾಶಿಯನ್ನು ಪ್ರವೇಶಿಸಲಿದ್ದು, ನಿಮಗೆ ಸುಖ, ಸಮೃದ್ಧಿಯನ್ನು ಕರುಣಿಸಲಿದ್ದಾನೆ.
ಆದರೆ, 4ನೇ ಮನೆಯಲ್ಲಿ ಇರುವ ಕುಜ, ತೃತೀಯ ಭಾವದಲ್ಲಿ ಇರುವ ಬುಧ ಹಾಗೂ ನವಮ ಭಾವದಲ್ಲಿರುವ ಕೇತು ನಿಮ್ಮ ಮನೆಯಲ್ಲಿ ನೆಮ್ಮದಿ ಹಾಳುಗೆಡವಲು ಯತ್ನಿಸಬಹುದು. ನರಗಳ ದೌರ್ಬಲ್ಯದಿಂದ ಕಾಲಿನ ತೊಂದರೆ ಕಾಣಿಸಬಹುದು. ಮಾನಸಿಕ ಒತ್ತಡದಿಂದ ತಲೆನೋವು, ಕಣ್ಣಿನ ತೊಂದರೆ ಎದುರಾಗಬಹುದು.
ಕುಲದೇವತೆ ಹಾಗೂ ಸುಬ್ರಹ್ಮಣ್ಯ ದೇವರ ಆರಾಧನೆಯಿಂದ ಈ ತಿಂಗಳಲ್ಲಿ ನಿಮಗೆ ಹೆಚ್ಚಿನ ಸುಖ ದೊರಕಲಿದೆ. ವಿಷ್ಣು ಸಹಸ್ರನಾಮ ಪಾರಾಯಣ, ರುದ್ರಪಠಣಗಳಿಂದ ಶುಭವಾಗಲಿದೆ. ಒಟ್ಟಾರೆ ನೋಡುವುದಾದರೆ, ಮೇ ತಿಂಗಳಲ್ಲಿ ನಿಮಗೆ ಶುಭವೇ ಜಾಸ್ತಿ.
ಭಾನುವಾರ ಮತ್ತು ಮಂಗಳವಾರಗಳು ಶುಭವಾರಗಳು. ನಿಮ್ಮ ರಾಶಿಯ ಅದೃಷ್ಟ ಸಂಖ್ಯೆ 1 ಮತ್ತು 9.
ನಾವು ಈವತ್ತು ಮೇ ತಿಂಗಳಲ್ಲಿ ಕರ್ಕಾಟಕ ಮತ್ತು ಸಿಂಹ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ.
ಕರ್ಕಾಟಕ ರಾಶಿ
ಕರ್ಕಾಟಕ ರಾಶಿಯ ಅಧಿಪತಿ ಚಂದ್ರ. ನಿಮ್ಮ ರಾಶಿಯಿಂದ 8ನೇ ಮನೆಯಲ್ಲಿ ಇದ್ದಾನೆ ಗುರು. ಇದು ನಿಮಗೆ ಅಷ್ಟೊಂದು ಶುಭಕರವಲ್ಲ. ಹೀಗಾಗಿ, ಕರ್ಕಾಟಕ ರಾಶಿಯವರಿಗೆ ಗುರುಬಲ ಕಡಿಮೆ ಎಂದೇ ಹೇಳಬಹುದು. ಜೊತೆಗೆ, ಸಪ್ತಮ ಭಾವದಲ್ಲಿರುವ ಶನಿ, ನಿಮಗೆ ಕಂಟಕನೇ. ಕುಜ ಕೂಡ ವ್ಯಯಸ್ಥಾನದಲ್ಲಿದ್ದು, ಪ್ರತಿಕೂಲನಾಗಿದ್ದಾನೆ. ಹೀಗಾಗಿ, ಮನೆಯಲ್ಲಿ ಗಂಡ-ಹೆಂಡತಿ ನಡುವೆ ಜಗಳ, ಮನಸ್ತಾಪ ಜಾಸ್ತಿಯಾಗಲಿದೆ. ಸಣ್ಣ ವಿಚಾರಗಳಿಗೂ ಭಿನ್ನಾಭಿಪ್ರಾಯ ಮೂಡಬಹುದು. ಮಕ್ಕಳ ನಡವಳಿಕೆ ನಿಮಗೆ ಚಿಂತೆ ತರಬಲ್ಲುದು. ಗೃಹಕೃತ್ಯಗಳಿಗಾಗಿ ಹೆಚ್ಚಿನ ಖರ್ಚು ಸಂಭವಿಸಲಿದೆ. ಕೂಡಿಟ್ಟ ಹಣ ವ್ಯಯವಾಗಲಿದೆ. ಜೊತೆಗೆ, ಆರೋಗ್ಯದಲ್ಲಿ ಏರುಪೇರು, ಬಂಧು-ಬಾಂಧವರಿಂದ, ಸ್ನೇಹಿತರಿಂದ ಅವಮಾನ, ಕೋರ್ಟು, ಕಚೇರಿ ವ್ಯಾಜ್ಯಗಳಲ್ಲಿ ತೊಂದರೆ, ವಿನಾಕಾರಣ ಅಲೆದಾಟ ಉಂಟಾಗಬಹುದು.
ಆದರೆ, ಲಾಭ ಭಾವದಲ್ಲಿ, ಅಂದರೆ, 11ನೇ ಮನೆಯಲ್ಲಿರುವ ರಾಹು, ಮನಸ್ಸಿಗೆ ಸಂತೋಷ, ಮಾನಸಿಕ ಧೈರ್ಯ ನೀಡಬಲ್ಲ. ಜೊತೆಗೆ ಉತ್ತಮ ಸ್ಥಾನಮಾನವನ್ನು ಕೂಡ ಕರುಣಿಸಬಲ್ಲ. ಕಾರಣ, ವೃಷಭ ರಾಶಿ, ರಾಹುವಿಗೆ ಉಚ್ಛಸ್ಥಾನ. ಅಲ್ಲದೆ, ಈ ರಾಶಿಯ ಅಧಿಪತಿಯಾದ ಶುಕ್ರ, ಉಚ್ಛಸ್ಥಾನದಲ್ಲಿ ಶುಭ ಭಾವದಲ್ಲಿ ವಿರಾಜಮಾನನಾಗಿದ್ದಾನೆ. ಆತನ ಜೊತೆ ಬುಧ ಕೂಡ ಶುಭ ಭಾವದಲ್ಲಿಯೇ ಇದ್ದಾನೆ. ಅಲ್ಲದೆ, ರಾಹು, ಶುಕ್ರ ಹಾಗೂ ಬುಧರು ಪರಸ್ಪರ ಮಿತ್ರತ್ವವನ್ನು ಹೊಂದಿದ್ದು, ಇವರೆಲ್ಲರೂ ನಿಮಗೆ ಶುಭ ಫಲವನ್ನು ನೀಡ್ತಾರೆ. ಈ ಅವಧಿಯಲ್ಲಿ ವಿವಾಹಾದಿ ಮಂಗಲಕಾರ್ಯಗಳು ಜರುಗಲಿವೆ. ಆಭರಣ ಖರೀದಿಗೆ ಸಕಾಲ. ಭೂಮಿ, ವಾಹನಗಳ ಖರೀದಿ ಯೋಗವಿದೆ.
ಇನ್ನು, ಪಂಚಮದಲ್ಲಿರುವ ಕೇತು ಅನಾನುಕೂಲನಾದರೂ, ಆತನಿಗದು ಉಚ್ಛಸ್ಥಾನ. ಹೀಗಾಗಿ, ಆತ ಅಷ್ಟೊಂದು ಬಾಧೆ ನೀಡಲಾರ.
ಶನಿ ನಿಮಗೆ ಪ್ರತಿಕೂಲನಾಗಿ ಇರುವುದರಿಂದ ಹನುಮ ಚಾಲಿಸಾ ಪಠಣ, ಶನಿಶಾಂತಿ, ಶನಿವಾರದ ದಿವಸ ಅಶ್ವತ್ಥ ಪ್ರದಕ್ಷಿಣೆ ಮಾಡುವುದು ಕ್ಷೇಮಕರ. ಗೋಪೂಜೆ ಮಾಡಿ, ಗೋಗ್ರಾಸ ನೀಡುವುದರಿಂದ ಶುಭವಾಗಲಿದೆ. ಶುಕ್ರವಾರದಂದು ದುರ್ಗಾ ನಮಸ್ಕಾರ ಪೂಜೆ, ಸಪ್ತಶತಿ ಪಾರಾಯಣ ಮಾಡುವುದು ಒಳ್ಳೆಯದು. ಒಟ್ಟಾರೆ ನೋಡುವುದಾದರೆ, ಮೇ ತಿಂಗಳು ನಿಮಗೆ ಮಿಶ್ರಫಲದಾಯಕ ಎನ್ನಲಡ್ಡಿಯಿಲ್ಲ.
ಭಾನುವಾರ ಹಾಗೂ ಸೋಮವಾರ ನಿಮಗೆ ಶುಭ ವಾರಗಳು. ಅದೃಷ್ಟ ಸಂಖ್ಯೆಗಳು 2 ಮತ್ತು 8.
ಸಿಂಹ ರಾಶಿ:
ಇನ್ನು, ಸಿಂಹ ರಾಶಿಯನ್ನು ನೋಡುವುದಾದರೆ, ಈ ರಾಶಿಯ ಅಧಿಪತಿ ರವಿ, ಮೇ 14ರವರೆಗೆ ಮೇಷ ರಾಶಿಯಲ್ಲಿ ಇರಲಿದ್ದು, ಅಷ್ಟೊಂದು ಶುಭಕರನಾಗಿಲ್ಲ. ಮೇ 14ರಂದು ವೃಷಭ ರಾಶಿಗೆ ರವಿಯ ಪ್ರವೇಶವಾಗಲಿದ್ದು, ನಿಮಗೆ ಶುಭವಾಗಲಿದೆ. ಆತ ನಿಮಗೆ ಉತ್ತಮ ಆರೋಗ್ಯ ಕರುಣಿಸಲಿದ್ದಾನೆ. ಕೀರ್ತಿ, ಸನ್ಮಾನಗಳಿಗೆ ನೀವು ಭಾಜನರಾಗಲಿದ್ದೀರಿ.
ಜೊತೆಗೆ, ಸಪ್ತಮ ಭಾವದ ಗುರು, ನಿಮಗೆ ಶುಭಫಲವನ್ನೇ ನೀಡುತ್ತಾನೆ. ಸಂತಾನಪ್ರಾಪ್ತಿ, ವಾಹನ ಖರೀದಿಗಳ ಯೋಗವಿದೆ. ಮನೆಯಲ್ಲಿ ಮಂಗಲಕಾರ್ಯ ಜರುಗಲಿದೆ. ಧನ ಪ್ರಾಪ್ತಿ, ಸುವರ್ಣ ವಸ್ತುಗಳ ಲಾಭಯೋಗವಿದೆ. ಕೈಗೊಂಡ ಕಾರ್ಯಗಳಲ್ಲಿ ಯಶಸ್ಸು ಲಭಿಸಲಿದೆ. ಅದೇ ರೀತಿ, ಜನ್ಮರಾಶಿಯಿಂದ 6ನೇ ಮನೆಯಲ್ಲಿ ಶನಿಯ ಸಂಚಾರ ಇರುವುದರಿಂದ ಉದ್ಯೋಗ, ವ್ಯಾಪಾರ-ವ್ಯವಹಾರಗಳಲ್ಲಿ ಉತ್ತಮ ಲಾಭ, ಕೋರ್ಟು, ಕಚೇರಿ ಕೆಲಸಗಳಲ್ಲಿ ಮುನ್ನಡೆ, ಸಾರ್ವಜನಿಕ ಕ್ಷೇತ್ರದಲ್ಲಿ ಮನ್ನಣೆ ಸಿಗಲಿದೆ. ವಿದ್ಯಾರ್ಥಿಗಳಿಗೆ ವಿದ್ಯೆಯಲ್ಲಿ ಉತ್ತಮ ಪ್ರಗತಿ ಕಂಡು ಬರಲಿದೆ. ಸಾಮಾಜಿಕ ರಂಗದಲ್ಲಿ, ರಾಜಕೀಯ ರಂಗದಲ್ಲಿ ಇರುವವರು ಶತ್ರುಗಳ ವಿರುದ್ಧ ಜಯ ಸಾಧಿಸುತ್ತಾರೆ. 11ನೇ ಮನೆಯಲ್ಲಿರುವ ಕುಜ ಕೂಡ ನಿಮಗೆ ಶುಭಫಲವನ್ನೇ ನೀಡುತ್ತಾನೆ. ನಿವೇಶನ, ಕೃಷಿ ಭೂಮಿ ಖರೀದಿಗೆ ಈ ತಿಂಗಳು ನಿಮಗೆ ಸಕಾಲ.
ಆದರೆ, ದಶಮ ಭಾವದಲ್ಲಿರುವ ರಾಹು, ಕಲಹಕ್ಕೆ ಪ್ರೇರಣೆ ನೀಡಿದರೆ, ಚತುರ್ಥ ಭಾವದ ಕೇತುವಿನಿಂದಾಗಿ ಮಾನಸಿಕ ಕ್ಲೇಶ, ಮಾನಹಾನಿ ಉಂಟಾಗಲಿದೆ. ಒಟ್ಟಾರೆ ನೋಡುವುದಾದರೆ, ನಿಮಗೆ ಮೇ ತಿಂಗಳು ಶುಭದಾಯಕ. ಹೊಸ ಉದ್ಯೋಗ, ವ್ಯಾಪಾರ, ವ್ಯವಹಾರ ಕೈಗೊಳ್ಳುವವರಿಗೆ ಈ ತಿಂಗಳು ಸೂಕ್ತ ಎನ್ನಬಹುದು.
ದುಷ್ಟಫಲಗಳ ನಿವಾರಣೆಗಾಗಿ ನವಗ್ರಹಶಾಂತಿ, ರುದ್ರಪಠಣ, ದುರ್ಗಾಸಪ್ತಶತಿ, ಲಲಿತಾ ಸಹಸ್ರನಾಮ ಪಾರಾಯಣಗಳನ್ನು ಮಾಡಬಹುದು. ಗುರುವಾರ, ಸೋಮವಾರ ಹಾಗೂ ಮಂಗಳವಾರಗಳು ಸಿಂಹರಾಶಿಯವರಿಗೆ ಶುಭವಾರಗಳು. ಅದೃಷ್ಟದ ಸಂಖ್ಯೆ 9 ಮತ್ತು 6.
ನಾವು ಈವತ್ತು ಮೇ ತಿಂಗಳಲ್ಲಿ ಮಿಥುನ ಮತ್ತು ಕನ್ಯಾ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ.
ಮಿಥುನ ರಾಶಿ
ಮಿಥುನ ಮತ್ತು ಕನ್ಯಾ, ಈ ಎರಡೂ ರಾಶಿಗಳಿಗೆ ಅಧಿಪತಿ ಬುಧ. ಅಷ್ಟೇ ಅಲ್ಲ, ಕನ್ಯಾ ರಾಶಿ, ರಾಹುವಿಗೆ ಸ್ವಕ್ಷೇತ್ರ ಕೂಡ. ಇನ್ನು, ಮಿಥುನ ರಾಶಿಯ ಅಧಿಪತಿಯಾಗಿರುವಂತಹ ಬುಧ, ವ್ಯಯ ಸ್ಥಾನದಲ್ಲಿ, ಅಂದರೆ 12ನೇ ಮನೆಯಲ್ಲಿ ಇದ್ದಾನೆ. ಹೀಗಾಗಿ, ನಿಮ್ಮ ಕೆಲಸ-ಕಾರ್ಯಗಳಲ್ಲಿ ನಿಮಗೆ ಅಪಜಯ ಕಾಡಬಹುದು. ಇನ್ನು, ಮೇ 26ರಂದು ಬುಧ, 12ನೇ ಮನೆಯಾದ ವೃಷಭದಿಂದ ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದಾನೆ. ಇದು ನಿಮಗೆ ಸಾಕಷ್ಟು ಶುಭ ಫಲ ನೀಡಲಿದೆ. ಆದರೆ, ಮೇ 29ರಂದು ಮಿಥುನದಲ್ಲಿರುವ ಬುಧ, ವಕ್ರಗತಿಯ ಚಲನೆ ಆರಂಭಿಸಿ, ಜೂನ್ 2ಕ್ಕೆ ಮತ್ತೆ ವೃಷಭಕ್ಕೆ ಪ್ರವೇಶ ಮಾಡಲಿದ್ದಾನೆ.
ಇನ್ನು, 9ನೇ ಮನೆಯಲ್ಲಿ ಭಾಗ್ಯಸ್ಥಾನದಲ್ಲಿರುವ ಗುರುವಿನಿಂದ ಮಿಥುನ ರಾಶಿಯವರಿಗೆ ಗುರುಬಲ ಲಭಿಸಲಿದೆ. ಈ ಅವಧಿಯಲ್ಲಿ ಒಳ್ಳೆಯ ಸ್ಥಾನಮಾನ, ಉದ್ಯೋಗದಲ್ಲಿ ಪ್ರಗತಿ ಕಾಣಿಸಲಿದೆ. ಮನೆ ಕಟ್ಟುವ ಯೋಗ ಕೂಡಿ ಬರಲಿದೆ. ಹೊಸ ಕೆಲಸ ಆರಂಭಿಸಲು, ನಿವೇಶನ ಕೊಳ್ಳಲು ಇದು ಸಕಾಲ. ಮನೆಯಲ್ಲಿ ಸುಖ-ಸಂತೋಷಗಳು ನೆಲೆಸಲಿವೆ. ಧನಲಾಭದ ಯೋಗವಿದೆ. ವಿದ್ಯಾರ್ಥಿಗಳಿಗೆ ಉನ್ನತ ವಿದ್ಯಾಭ್ಯಾಸದಲ್ಲಿ ಪ್ರಗತಿ ಕಂಡು ಬರಲಿದೆ. ಜೊತೆಗೆ, 6ನೇ ಮನೆಯಲ್ಲಿ ಉಚ್ಚಸ್ಥಾನದಲ್ಲಿರುವ ಇರುವ ಕೇತು ಕೂಡ ನಿಮಗೆ ಸುಖ-ಸಂತೋಷ ತರಬಲ್ಲ.
ಆದರೆ, ಅಷ್ಟಮದಲ್ಲಿರುವ ಶನಿ ನಿಮಗೆ ಪ್ರತಿಕೂಲ ಪರಿಣಾಮ ಬೀರಬಹುದು. ಹೀಗಾಗಿ, ಮನೆಯಲ್ಲಿ ಪತಿ-ಪತ್ನಿಯರ ನಡುವೆ ವಿರಸ, ಮಾನಸಿಕವಾಗಿ ಕಿರಿಕಿರಿ, ವ್ಯರ್ಥ ಅಲೆದಾಟ, ದುರ್ಜನರಿಂದ ಅವಮಾನ ಎದುರಿಸಬೇಕಾಗಬಹುದು. ಸಾಮಾಜಿಕ ಕ್ಷೇತ್ರದಲ್ಲಿರುವವರಿಗೆ ಸ್ಥಾನ ನಾಶದ ಭಯ ಕಾಡಬಹುದು. ಶನಿಪೀಡೆ ನಿವಾರಣೆಗೆ ಹನುಮ ಚಾಲಿಸಾ ಪಠಣ, ಶನಿಶಾಂತಿ, ಶನಿವಾರದ ದಿವಸ ಅಶ್ವತ್ಥ ಪ್ರದಕ್ಷಿಣೆ ಮಾಡುವುದು ಕ್ಷೇಮಕರ.
ಇನ್ನು, ಲಗ್ನದಲ್ಲಿರುವ ಕುಜನಿಗೆ ಲಗ್ನಾಧಿಪತಿಯಾದ ಬುಧನ ಸ್ಥಾನ ಶತ್ರುಸ್ಥಾನ. ಹೀಗಾಗಿ, ಆತ, ನಿಮ್ಮ ರಾಶಿಗೆ ಪ್ರತಿಕೂಲ ಪರಿಣಾಮವನ್ನೇ ಬೀರುತ್ತಾನೆ. ಹೀಗಾಗಿ, ಇತರರ ಜೊತೆ ಕಲಹ, ರಕ್ತ ಸಂಬಂಧಿ, ಉದರ ಸಂಬಂಧಿ ರೋಗಗಳು, ಮನಸ್ಸಿನಲ್ಲಿ ಚಿಂತೆಗಳು ಕಾಡಬಹುದು. ಕಳ್ಳರ ಕಾಟ, ಅಗ್ನಿ ಅನಾಹುತದ ಭಯ ಇರಲಿದೆ. ವಾಹನ ಚಲಾಯಿಸುವಾಗ ಎಚ್ಚರದಿಂದಿರಿ.
ಇನ್ನು, ರಾಹು ಕೂಡ ವ್ಯಯ ಸ್ಥಾನದಲ್ಲಿದ್ದು, ನಿಮ್ಮ ಕೆಲಸ, ಕಾರ್ಯಗಳಲ್ಲಿನ ಜಯಕ್ಕೆ ಅಡಚಣೆ ಉಂಟು ಮಾಡಬಹುದು. ಕುಜ ಹಾಗೂ ರಾಹು ದೋಷ ಪರಿಹಾರಕ್ಕಾಗಿ ಮಂಗಳವಾರ ಸುಬ್ರಹ್ಮಣ್ಯನ ಆರಾಧನೆ ಮಾಡುವುದು ಒಳಿತು.
ಒಟ್ಟಾರೆ ನೋಡುವುದಾದರೆ, ಮೇ ತಿಂಗಳಲ್ಲಿ ಮಿಥುನ ರಾಶಿಯವರಿಗೆ ಉತ್ತಮ ಫಲವಿದೆ. ನಿಮ್ಮ ರಾಶಿಗೆ ಭಾನುವಾರ, ಶುಕ್ರವಾರ ಹಾಗೂ ಬುಧವಾರಗಳು ಶುಭವಾರಗಳು. ಅದೃಷ್ಟ ಸಂಖ್ಯೆಗಳು 2 ಮತ್ತು 5.
ಕನ್ಯಾ ರಾಶಿ:
ಇನ್ನು, ಕನ್ಯಾ ರಾಶಿಯನ್ನು ನೋಡುವುದಾದರೆ, ರಾಶಿಯ ಅಧಿಪತಿ ಬುಧ, ನವಮ ಭಾವದಲ್ಲಿದ್ದಾನೆ. ಸ್ವಕ್ಷೇತ್ರದ ರಾಹು, ಉಚ್ಛಸ್ಥಾನದಲ್ಲಿ ನವಮ ಭಾವದಲ್ಲಿದ್ದಾನೆ. ಹೀಗಾಗಿ, ಕೆಲಸ ಕಾರ್ಯಗಳಲ್ಲಿ ವಿಘ್ನಗಳು ಎದುರಾಗಬಹುದು. ಆದರೆ, ಈ ಎರಡೂ ಗ್ರಹಗಳ ಜೊತೆ ಶುಕ್ರ ಕೂಡ ನವಮ ಭಾವದಲ್ಲಿಯೇ ಇದ್ದು, ನಿಮಗೆ ಶುಭಕಾರಕನಾಗಿದ್ದಾನೆ. ಮೇಲಾಗಿ, ವೃಷಭ ರಾಶಿ, ಶುಕ್ರನಿಗೆ ಉಚ್ಛಸ್ಥಾನದ ರಾಶಿಯಾಗಿದ್ದು, ಆತನಿಂದ ಶುಭ ಫಲ ನಿರೀಕ್ಷಿಸಬಹುದು. ಜೊತೆಗೆ, ತೃತೀಯ ಭಾವದಲ್ಲಿ ಉಚ್ಚಸ್ಥಾನದಲ್ಲಿ ಇರುವ ಕೇತು, ಹಣಕಾಸಿನ ವಿಚಾರದಲ್ಲಿ, ಕೆಲಸ-ಕಾರ್ಯಗಳಲ್ಲಿ ಶುಭ ಫಲವನ್ನೇ ಕೊಡುತ್ತಾನೆ.
ಆದರೆ, 10ನೇ ಮನೆಯಲ್ಲಿರುವ ಕುಜ, ನಿಮಗೆ ಶ್ರೇಯಸ್ಸು ನೀಡುವ ಸಾಧ್ಯತೆ ಕಡಿಮೆ. ಅಲ್ಲದೆ, ಗುರು, ಶತ್ರುಭಾವ ಅಂದರೆ, 6ನೇ ಮನೆಯಲ್ಲಿ ಇದ್ದಾನೆ. ಹೀಗಾಗಿ, ನಿಮಗೆ ಗುರು ಬಲ ಕಡಿಮೆ. ಇದರಿಂದಾಗಿ ಮಾನಸಿಕವಾದ ಚಿಂತೆ ನಿಮ್ಮನ್ನು ಬಹುವಾಗಿ ಕಾಡಬಹುದು. ಮನೆಯಲ್ಲಿ, ಮಿತ್ರರೊಂದಿಗೆ ಕಲಹ, ಉದ್ಯೋಗದಲ್ಲಿ ಕಿರಿಕಿರಿ ಉಂಟಾಗಬಹುದು. ಇದು ನಿಮ್ಮಲ್ಲಿ ಕೋಪದ ಪ್ರವೃತ್ತಿಯನ್ನು ಹೆಚ್ಚಿಸಬಹುದು. ಆರ್ಥಿಕವಾಗಿ ಸಂಕಷ್ಟ ಎದುರಾಗಲಿದೆ. ಜೊತೆಗೆ, ಪಂಚಮ ಶನಿ ನಿಮ್ಮ ಕಷ್ಟವನ್ನು ಮತ್ತಷ್ಟು ಹೆಚ್ಚಿಸಲಿದ್ದಾನೆ. ವಾಸಸ್ಥಳದ ಬದಲಾವಣೆ ಮಾಡಬೇಕಾಗಿ ಬರಬಹುದು. ಶುಭಕಾರ್ಯಗಳಿಗೆ ಅಡ್ಡಿ ಎದುರಾಗಬಹುದು. ಕಫ, ಕೆಮ್ಮು, ಉಬ್ಬಸದಂತಹ ಅನಾರೋಗ್ಯಗಳು ನಿಮ್ಮನ್ನು ಕಾಡಬಹುದು.
ಸಂಕಷ್ಟ ನಿವಾರಣೆಗೆ, ಮಂಗಳವಾರದ ದಿನ ಗಣಪತಿ, ಸುಬ್ರಹ್ಮಣ್ಯನ ಆರಾಧನೆ ಮಾಡಿ. ಶನಿಪೀಡೆಯಿಂದ ಪಾರಾಗಲು ಶಿವಸ್ತೋಸ್ತ್ರ ಪಠಣ, ರುದ್ರ ಪಠಣ, ಹನುಮಾನ್ ಚಾಲಿಸಾ ಪಠಿಸಿ. ಪ್ರತಿದಿನ ಬೆಳಗ್ಗೆ ಅಶ್ವತ್ಥ ಪ್ರದಕ್ಷಿಣೆ ಮಾಡುವುದು ಶುಭಕರ. ಒಟ್ಟಾರೆ ನೋಡುವುದಾದರೆ, ನಿಮಗೆ ಈ ತಿಂಗಳು ಮಿಶ್ರಫಲದಾಯಕ ಎನ್ನಬಹುದು.
ಕನ್ಯಾ ರಾಶಿಯವರಿಗೆ ಭಾನುವಾರ ಮತ್ತು ಶುಕ್ರವಾರ ಶುಭವಾರಗಳು. ಅದೃಷ್ಟ ಸಂಖ್ಯೆ 3,5,6.
ನಾವು ಈವತ್ತು ಮೇ ತಿಂಗಳಲ್ಲಿನ ವೃಷಭ ಹಾಗೂ ತುಲಾ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ. ಮೇ ತಿಂಗಳಲ್ಲಿನ ಗೋಚಾರ ಫಲ, ಅಂದರೆ, ಯಾವ ರಾಶಿಯಲ್ಲಿ ಯಾವ ಗ್ರಹದ ಸಂಚಾರವಿದೆ, ಗ್ರಹಗಳ ಸ್ಥಾನಪಲ್ಲಟ, ಅದರಿಂದ ಆ ರಾಶಿಯ ಮೇಲೆ ಆಗುವಂತಹ ಪರಿಣಾಮಗಳು ಮತ್ತು ಗ್ರಹದೋಷಗಳ ನಿವಾರಣೆಗೆ ಇರುವಂತಹ ಪರಿಹಾರ ಕ್ರಮಗಳ ಬಗ್ಗೆ ನೋಡೋಣ.
ವೃಷಭ ರಾಶಿ
ವೃಷಭ ಹಾಗೂ ತುಲಾ, ಈ ಎರಡೂ ರಾಶಿಗಳಿಗೆ ಅಧಿಪತಿ ಆಗಿರುವಂತವನು ಶುಕ್ರ. ಮೇ 4ರಂದು ಶುಕ್ರ, ವೃಷಭ ರಾಶಿ ಪ್ರವೇಶಿಸಲಿದ್ದು, ಮೇ 28ರವರೆಗೂ ಇಲ್ಲಿಯೇ ಇರಲಿದ್ದಾನೆ. ತನ್ನದೇ ಆಧಿಪತ್ಯದ ಉಚ್ಛಸ್ಥಾನದಲ್ಲಿರುವ ಶುಕ್ರ, ನಿಮಗೆ ಶುಭಫಲಗಳನ್ನು ನೀಡಲಿದ್ದಾನೆ. ಭೋಗ ಜೀವನದ ಸುಖ-ಸಮೃದ್ಧಿಯನ್ನು ನೀಡಲಿದ್ದಾನೆ. ಅವಿವಾಹಿತರಿಗೆ ವಿವಾಹ ಯೋಗ ಕೂಡಿ ಬರಲಿದೆ.
ಆದರೆ, ಗುರು ದಶಮ ಸ್ಥಾನದಲ್ಲಿ ಇರುವುದರಿಂದ ವೃಷಭ ರಾಶಿಯವರಿಗೆ ಈ ತಿಂಗಳಲ್ಲಿ ಗುರುಬಲ ಕಡಿಮೆ. ಹೀಗಾಗಿ, ಹೊಸ ಕಾರ್ಯ, ವ್ಯವಹಾರಗಳಿಗೆ ಕೈ ಹಾಕಿದರೆ, ಅಡಚಣೆ ಎದುರಾದೀತು. ಕುಟುಂಬದಲ್ಲಿ ಸ್ವಲ್ಪ ಕಿರಿಕಿರಿ, ಕೋರ್ಟು, ಕಚೇರಿ ವ್ಯಾಜ್ಯಗಳಲ್ಲಿ ತೊಂದರೆ ಎದುರಾದೀತು. ಹಣಕಾಸಿನ ತೊಂದರೆ ಕಾಡಬಹುದು. ಇನ್ನು, 9ನೇ ಸ್ಥಾನದಲ್ಲಿರುವ ಶನಿ, ಜನ್ಮರಾಶಿಯಲ್ಲಿರುವ ರಾಹು, ಬುಧ ಹಾಗೂ ಸಪ್ತಮ ಭಾವದಲ್ಲಿ ಇರುವ ಕೇತುವಿನಿಂದಾಗಿ ಧನಹಾನಿ ಉಂಟಾಗುವ ಸಾಧ್ಯತೆಯಿದೆ. ಅನಾರೋಗ್ಯ, ಬಂಧುಗಳ ಜೊತೆ ವಿರೋಧ, ಸಲ್ಲದ ಅಪವಾದ, ಅಧಿಕ ತಿರುಗಾಟಗಳು ಎದುರಾಗಬಹುದು. ಗಂಡ-ಹೆಂಡತಿ ನಡುವೆ, ತಂದೆ-ತಾಯಿಗಳ ಜತೆ ಆಗಾಗ ಜಗಳವಾಗುವ ಸಾಧ್ಯತೆ ಇದೆ. ತಂದೆಗೆ ಅನಾರೋಗ್ಯ ಕಾಡಬಹುದು. ಉದ್ಯೋಗಸ್ಥರಿಗೆ ಮೇಲಾಧಿಕಾರಿಗಳಿಂದ ಕಿರಿ ಕಿರಿ ಎದುರಾಗಬಹುದು.
ಇನ್ನು, ಮೇ 26ರವರೆಗೆ ಇದೇ ರಾಶಿಯಲ್ಲಿರುವ ಬುಧ ಕೂಡ ನಿಮಗೆ ಶುಭ ಫಲವನ್ನೇ ನೀಡಲಿದ್ದಾನೆ. ಈ ಮಧ್ಯೆ, ಬುಧ, ಮೇ 26ರಂದು ವೃಷಭ ರಾಶಿಯಿಂದ ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದಾನೆ. ಮೇ 29ರಂದು ಮಿಥುನದಲ್ಲಿರುವ ಬುಧ, ವಕ್ರಗತಿಯ ಚಲನೆ ಆರಂಭಿಸಿ, ಜೂನ್ 2ಕ್ಕೆ ಮತ್ತೆ ವೃಷಭಕ್ಕೆ ಪ್ರವೇಶ ಮಾಡಲಿದ್ದಾನೆ. ಇನ್ನು ದ್ವಿತೀಯ ಭಾವದಲ್ಲಿರುವ ಕುಜ ಪ್ರತಿಕೂಲ ಪರಿಣಾಮವನ್ನೇ ಬೀರುವ ಸಾಧ್ಯತೆಯಿದ್ದು, ಶತ್ರುಗಳು ನಿಮ್ಮನ್ನು ಕಾಡಬಹುದು.
ಹೀಗಾಗಿ, ಸಂಕಷ್ಟ ಪರಿಹಾರಕ್ಕಾಗಿ ನವಗ್ರಹ ಶಾಂತಿ ಅಥವಾ ಶನಿಶಾಂತಿ ಮಾಡಿಸುವುದು ಒಳ್ಳೆಯದು. ಇನ್ನು ಜನ್ಮ ನಕ್ಷತ್ರದಂದು ಶಿವನಿಗೆ ರುದ್ರಾಭಿಷೇಕ, ಶುಕ್ರವಾರದಂದು ದುರ್ಗಾಪೂಜೆ ಮಾಡುವುದರಿಂದ ಒಳಿತಾಗಲಿದೆ. ಒಟ್ಟಾರೆ ನೋಡುವುದಾದರೆ, ಮೇ ತಿಂಗಳು ಮಿಶ್ರಫಲದಾಯಕ ಎನ್ನಬಹುದು. ವೃಷಭ ರಾಶಿಯವರಿಗೆ ಬುಧವಾರ ಮತ್ತು ಶನಿವಾರ ಶುಭ ವಾರಗಳು. ಅದೃಷ್ಟ ಸಂಖ್ಯೆಗಳು 1,2 ಮತ್ತು 8.
ತುಲಾ ರಾಶಿ:
ಇನ್ನು, ತುಲಾ ರಾಶಿಯನ್ನು ನೋಡುವುದಾದರೆ, ರಾಶಿಯ ಅಧಿಪತಿಯಾಗಿರುವ ಶುಕ್ರ, ಮೇ 4ರಂದು ತನ್ನದೇ ಆದಿಪತ್ಯದ ಇನ್ನೊಂದು ರಾಶಿಯಾಗಿರುವ ವೃಷಭಕ್ಕೆ ಬರಲಿದ್ದಾನೆ. ಮೇ 28ರವರೆಗೂ ವೃಷಭದಲ್ಲಿಯೇ ಇರಲಿದ್ದಾನೆ. ತನ್ನದೇ ಆಧಿಪತ್ಯದ ಉಚ್ಛಸ್ಥಾನದಲ್ಲಿರುವ ಶುಕ್ರ, ನಿಮಗೆ ಶುಭಫಲಗಳನ್ನೇ ನೀಡಲಿದ್ದಾನೆ. ಅವಿವಾಹಿತರಿಗೆ ವಿವಾಹ ಯೋಗ ಕೂಡಿ ಬರಲಿದೆ.
ಅಷ್ಟೇ ಅಲ್ಲ, ಪಂಚಮ ಭಾವದಲ್ಲಿರುವ ಗುರುವಿಂದಾಗಿ ನಿಮಗೆ ಗುರು ಬಲ ಜಾಸ್ತಿ. ಹೀಗಾಗಿ, ಹಣಕಾಸಿನ ಸ್ಥಿತಿ ಸುಧಾರಿಸಲಿದೆ. ಮನೆಯಲ್ಲಿ ಮಂಗಲ ಕಾರ್ಯಗಳು ಜರುಗಲಿವೆ. ಕೆಲಸ-ಕಾರ್ಯಗಳಲ್ಲಿ ಯಶಸ್ಸು ಸಿಗಲಿದೆ. ಉನ್ನತ ಸ್ಥಾನ ಪ್ರಾಪ್ತಿಯ ಯೋಗವಿದೆ. ಹೊಸ ವಾಹನಗಳ ಖರೀದಿ ಮಾಡಬಹುದು.
ಇನ್ನು, ಅಷ್ಟಮ ಭಾವದಲ್ಲಿ ಇರುವ ಬುಧ ಕೂಡ ನಿಮಗೆ ಶುಭ ಫಲವನ್ನೇ ನೀಡುತ್ತಾನೆ. ಮೇ 26ರಂದು ಬುಧ, ವೃಷಭ ರಾಶಿಯಿಂದ ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದಾನೆ. ಮೇ 29ರಂದು ಮಿಥುನದಲ್ಲಿರುವ ಬುಧ, ವಕ್ರಗತಿಯ ಚಲನೆ ಆರಂಭಿಸಿ, ಜೂನ್ 2ಕ್ಕೆ ಮತ್ತೆ ವೃಷಭಕ್ಕೆ ಪ್ರವೇಶ ಮಾಡಲಿದ್ದಾನೆ.
ಆದರೆ, ಚತುರ್ಥ ಭಾವದಲ್ಲಿರುವ ಶನಿ ಹಾಗೂ 9ನೇ ಮನೆಯಲ್ಲಿರುವ ಕುಜ, ನಿಮ್ಮ ರಾಶಿಗೆ ಶುಭಕರವಾಗಿಲ್ಲ. ರಾಹು ಅಷ್ಟಮದಲ್ಲಿದ್ದು, ಕೇತು ದ್ವಿತೀಯ ಭಾವದಲ್ಲಿದ್ದು, ನಿಮಗೆ ಅಶುಭರಾಗಿದ್ದಾರೆ. ಇದರಿಂದಾಗಿ ಮನೆಯಲ್ಲಿ ಸ್ವಲ್ಪ ಕಿರಿಕಿರಿ, ಕೌಟುಂಬಿಕ ವಿವಾದಗಳು ತಲೆದೋರಬಹುದು. ಅನಾವಶ್ಯಕ ಖರ್ಚು ಸಂಭವಿಸಬಹುದು. ಆಕಸ್ಮಿಕ ಅವಘಡ, ಕಳ್ಳರ ಭಯ ಕಾಡಬಹುದು. ದೂರಸಂಚಾರ ಕೈಗೊಳ್ಳುವ ಸಾಧ್ಯತೆಯಿದೆ. ಉದ್ಯೋಗದಲ್ಲಿ ಕಿರಿಕಿರಿ, ಮೇಲಾಧಿಕಾರಿಗಳಿಂದ ಕಿರುಕುಳ ಉಂಟಾಗುವ ಸಾಧ್ಯತೆ ಇದೆ. ಕಫ, ಕೆಮ್ಮು, ಉಬ್ಬಸದಂತಹ ಅನಾರೋಗ್ಯ ನಿಮ್ಮನ್ನು ತಿಂಗಳಪೂರ್ತಿ ಕಾಡಬಹುದು. ಮಡದಿ, ಮಕ್ಕಳ ಆರೋಗ್ಯದಲ್ಲಿ ಏರುಪೇರು, ಸ್ಥಳ ಬದಲಾವಣೆಯ ಸಾಧ್ಯತೆ ಕೂಡ ಇದೆ.
ಹೀಗಾಗಿ, ಸಂಕಷ್ಟ ಪರಿಹಾರಕ್ಕಾಗಿ ಕುಲದೇವತೆಯನ್ನು ಪ್ರಾರ್ಥಿಸಿ. ಸುಬ್ರಹ್ಮಣ್ಯ ಕ್ಷೇತ್ರದ ದರ್ಶನ ಮಾಡಿ. ಶುಕ್ರವಾರದಂದು ದುರ್ಗಾ ಪೂಜೆ, ಚಂಡಿಕಾ ಪಾರಾಯಣ, ನವಗ್ರಹ ಶಾಂತಿ ಮಾಡಿಸುವುದರಿಂದ ಶುಭ ಫಲ ಉಂಟಾಗಲಿದೆ. ಒಟ್ಟಿನಲ್ಲಿ ನಿಮಗೆ ಈ ತಿಂಗಳು ಮಿಶ್ರಫಲದಾಯಕ ಎನ್ನಬಹುದು.
ತುಲಾ ರಾಶಿಯವರಿಗೆ ಶನಿವಾರ ಮತ್ತು ಬುಧವಾರ ಶುಭವಾರಗಳು. ಅದೃಷ್ಟ ಸಂಖ್ಯೆ 1 ಮತ್ತು 6.
ನಾವು ಈವತ್ತು ಮೇ ತಿಂಗಳಲ್ಲಿ ಮೇಷ ಹಾಗೂ ವೃಶ್ಚಿಕ ರಾಶಿಗಳವರ ರಾಶಿಫಲ ಹೇಗಿದೆ ಎಂಬುದನ್ನು ನೋಡೋಣ. 2021ರ ಮೇ ತಿಂಗಳಲ್ಲಿನ ಗೋಚಾರ ಫಲ, ಅಂದರೆ, ಯಾವ ರಾಶಿಯಲ್ಲಿ ಯಾವ ಗ್ರಹದ ಸಂಚಾರವಿದೆ, ಗ್ರಹಗಳ ಸ್ಥಾನಪಲ್ಲಟ, ಅದರಿಂದ ಆ ರಾಶಿಯ ಮೇಲೆ ಆಗುವಂತಹ ಪರಿಣಾಮಗಳು ಮತ್ತು ಗ್ರಹದೋಷಗಳ ನಿವಾರಣೆಗೆ ಇರುವಂತಹ ಪರಿಹಾರ ಕ್ರಮಗಳ ಬಗ್ಗೆ ನೋಡೋಣ.
ಮೇಷ ಹಾಗೂ ವೃಶ್ಚಿಕ, ಈ ಎರಡೂ ರಾಶಿಗಳಿಗೆ ಅಧಿಪತಿ ಆಗಿರುವಂತವನು ಕುಜ. ಮೇಷ ರಾಶಿಯಿಂದ ಮೂರನೇ ಮನೆಯಲ್ಲಿ ಇರುವ ಕುಜ, ಈ ತಿಂಗಳಲ್ಲಿ ನಿಮಗೆ ಶುಭ ಫಲವನ್ನೇ ನೀಡಲಿದ್ದಾನೆ. ಇನ್ನು, ತಿಂಗಳಪೂರ್ತಿ ಲಾಭ ಭಾವದಲ್ಲಿ ಅಂದರೆ, 11ನೇ ಸ್ಥಾನದಲ್ಲಿ ಇರುವಂತಹ ಗುರು, ಮೇಷ ರಾಶಿಯವರಿಗೆ ಉತ್ತಮವಾದಂತಹ ಫಲವನ್ನೇ ನೀಡ್ತಾನೆ. ಉದ್ಯೋಗದಲ್ಲಿ ಇರುವವರಿಗೆ ಭಡ್ತಿ, ಸಾಮಾಜಿಕ ಕ್ಷೇತ್ರದಲ್ಲಿ ಇರುವವರಿಗೆ ಗೌರವಯುತ ಸ್ಥಾನಮಾನ ಹಾಗೂ ಉನ್ನತ ಪದವಿ ದೊರಕುವ ಅವಕಾಶ ಇದೆ. ಮನೆ ನಿರ್ಮಾಣ, ಹೊಸ ವ್ಯವಹಾರ ಆರಂಭಿಸುವವರಿಗೆ ಶುಭ ಯೋಗ ಕೂಡಿ ಬರಲಿದೆ.
ಇನ್ನು, ಮೇ 4ರಂದು ಶುಕ್ರ, ವೃಷಭ ರಾಶಿ ಪ್ರವೇಶಿಸಲಿದ್ದು, ಮೇ 28ರವರೆಗೂ ಇಲ್ಲಿಯೇ ಇರಲಿದ್ದಾನೆ. ವೃಷಭ ರಾಶಿಯ ಅಧಿಪತಿಯಾಗಿರುವ ಶುಕ್ರ, ಉಚ್ಛಸ್ಥಾನದಲ್ಲಿದ್ದು, ನಿಮಗೆ ಶುಭಫಲವನ್ನೇ ನೀಡುತ್ತಾನೆ. ಅವಿವಾಹಿತರಿಗೆ ವಿವಾಹ ಯೋಗ ಕೂಡಿ ಬರಲಿದೆ. ಇನ್ನು ಮೇ 26ರವರೆಗೆ ಇದೇ ರಾಶಿಯಲ್ಲಿರುವ ಬುಧ ಕೂಡ ನಿಮಗೆ ಶುಭ ಫಲವನ್ನೇ ನೀಡಲಿದ್ದಾನೆ. ಮೇ 26ರಂದು ಆತ ತನ್ನ ಅಧಿಪತ್ಯದ ರಾಶಿಯಾದ ಮಿಥುನ ರಾಶಿಯನ್ನು ಪ್ರವೇಶಿಸಲಿದ್ದಾನೆ. ಇನ್ನು, ಮೇ 29ರಂದು ಮಿಥುನದಲ್ಲಿರುವ ಬುಧ, ವಕ್ರಗತಿಯ ಚಲನೆ ಆರಂಭಿಸಿ, ಜೂನ್ 2ಕ್ಕೆ ಮತ್ತೆ ವೃಷಭಕ್ಕೆ ಪ್ರವೇಶ ಮಾಡಲಿದ್ದಾನೆ.
ಆದರೆ, 10ನೇ ಮನೆಯಲ್ಲಿ ವಿರಾಜಮಾನನಾಗಿರುವ ಕರ್ಮಾಧಿಪತಿ ಶನಿ, ನಿಮಗೆ ಪ್ರತಿಕೂಲ ಪರಿಣಾಮ ಬೀರಬಹುದು. ಇದರಿಂದಾಗಿ ನಿಮಗೆ ಅನಾರೋಗ್ಯ, ಸ್ವಲ್ಪ ಮಟ್ಟಿಗೆ ಹಣಕಾಸಿನ ಸಮಸ್ಯೆ ಎದುರಾಗಬಹುದು. ಅಲ್ಲದೆ, ಉದ್ಯೋಗದಲ್ಲಿ ಕಿರಿಕಿರಿ, ಬದಲಾವಣೆ ನಿರೀಕ್ಷಿತ. ಜೊತೆಗೆ, ಶತ್ರುಗಳ ಕಾಟ, ಸ್ತ್ರಿ ಸಂಬಂಧ ವ್ಯವಹಾರಗಳಿಂದ ಮನಸ್ಸಿಗೆ ಚಿಂತೆ ಕಾಡಬಹುದು. ವಿದ್ಯಾರ್ಥಿಗಳಿಗೆ ಓದಿನಲ್ಲಿ ಸ್ವಲ್ಪಮಟ್ಟಿನ ಹಿನ್ನಡೆ ಉಂಟಾಗಬಹುದು. ಈ ಮಧ್ಯೆ, ಮೇ 23ರಂದು ಮಕರ ರಾಶಿಯಲ್ಲಿ ಇರುವ ಶನಿ, ವಕ್ರಗತಿಯಲ್ಲಿ ಚಲಿಸಲು ಆರಂಭಿಸುತ್ತಾನೆ.
ಇನ್ನು, ಮೇ14 ರಂದು ರವಿ, ವೃಷಭ ರಾಶಿಯನ್ನು ಪ್ರವೇಶಿಸಲಿದ್ದು, ಇದು ನಿಮಗೆ ಅಷ್ಟೊಂದು ಶುಭಕರವೇನಲ್ಲ. ಈ ಮಧ್ಯೆ, ಎರಡನೇ ಮನೆಯಲ್ಲಿರುವ ರಾಹುವಿನಿಂದಾಗಿ ರಾಜಕೀಯ ಕ್ಷೇತ್ರದಲ್ಲಿ ಇರುವವರಿಗೆ ಅವಮಾನ, ಮೃತ್ಯುಭಯ, ಅಪವಾದಗಳು ಎದುರಾಗಬಹುದು. ಬೇರೆ ಯಾರಿಗೋಸ್ಕರನೋ ಹಣ ಖರ್ಚು ಮಾಡಬೇಕಾಗಿ ಬರಬಹುದು. ಇನ್ನು ಆಯುಷ್ಯ ಭಾವದಲ್ಲಿ ಇರುವ ಕೇತುವಿನಿಂದಾಗಿ ಮೇಷ ರಾಶಿಯವರಿಗೆ ರೋಗಗಳು ಬಾಧಿಸಬಹುದು.
ಹೀಗಾಗಿ, ಶಿವನ ಆರಾಧನೆ, ಶನಿಶಾಂತಿ ಇಲ್ಲವೇ ನವಗ್ರಹ ಜಪ, ಸುಬ್ರಹ್ಮಣ್ಯ ಸ್ವಾಮೀಯ ಆರಾಧನೆಗಳನ್ನು ಮಾಡುವ ಮೂಲಕ ನಿಮ್ಮ ಸಂಕಷ್ಟಗಳನ್ನು ಪರಿಹರಿಸಿಕೊಳ್ಳಬಹುದು. ಒಟ್ಟಾರೆ ನೋಡುವುದಾದರೆ, ಮೇ ತಿಂಗಳಲ್ಲಿ ಮೇಷ ರಾಶಿಯವರು ಉತ್ತಮವಾದ ಫಲವನ್ನೇ ಪಡೆಯಬಹುದು.
ಮೇಷ ರಾಶಿಯವರಿಗೆ ಭಾನುವಾರ, ಸೋಮವಾರ ಹಾಗೂ ಗುರುವಾರ ಶುಭ ವಾರಗಳು. ಅದೃಷ್ಟ ಸಂಖ್ಯೆಗಳು 3,4 ಮತ್ತು 9.
ವೃಶ್ಚಿಕ ರಾಶಿ:
ಇನ್ನು ವೃಶ್ಚಿಕ ರಾಶಿಯನ್ನು ನೋಡುವುದಾದರೆ, ರಾಶಿಯ ಅಧಿಪತಿಯಾಗಿರುವ ಕುಜ, ನಿಮ್ಮ ರಾಶಿಯಿಂದ 8ನೇ ಮನೆಯಲ್ಲಿದ್ದು, ಅಷ್ಟೊಂದು ಶುಭಕರನಲ್ಲ. ಇನ್ನು, ಸಪ್ತಮದ ರಾಹು, ಜನ್ಮ ರಾಶಿಯಲ್ಲಿರುವ ಕೇತುವಿನಿಂದಾಗಿ ನಿಮಗೆ ಮಾನಸಿಕವಾಗಿ ಚಿಂತೆ ಹೆಚ್ಚಬಹುದು. ಕೆಟ್ಟ ವ್ಯಸನಗಳತ್ತ ಮನಸ್ಸು ನಿಮ್ಮನ್ನು ಸೆಳೆಯಲಿದೆ. ನರ ಸಂಬಂಧಿ ರೋಗಗಳು, ಉದರ ಸಮಸ್ಯೆ, ಪಿತ್ತೋದ್ರೇಕ, ಮೂತ್ರಾಶಯ ಸಂಬಂಧಿ ಅನಾರೋಗ್ಯಗಳು ನಿಮ್ಮನ್ನು ಕಾಡಬಹುದು. ದಾಂಪತ್ಯದಲ್ಲಿ ವಿರಸ ತಲೆದೋರಬಹುದು. ನಿಮ್ಮ ಮಾನಹಾನಿಗೆ ಯತ್ನ ನಡೆಯುವ ಸಾಧ್ಯತೆಯೂ ಇದೆ. ಸಾಲದ ಹೊರೆ ಕೂಡ ಸ್ವಲ್ಪ ಹೆಚ್ಚಾಗಬಹುದು.
ಅದೇ ರೀತಿ, ನಿಮ್ಮ ಜನ್ಮರಾಶಿಯಿಂದ 4ನೇ ಮನೆಯಲ್ಲಿರುವ ಗುರು ಕೂಡ ನಿಮಗೆ ಅಷ್ಟೊಂದು ಶುಭವಾರ್ತೆಯನ್ನು ತರಲಾರ. ಮನೆಯಲ್ಲಿ, ಬಂಧು-ಬಾಂಧವರ ಜೊತೆ, ಮಿತ್ರರ ಜೊತೆ ಕಲಹ, ಉದ್ಯೋಗದಲ್ಲಿ ಕಿರಿಕಿರಿ ಉಂಟಾಗಬಹುದು. ಆರ್ಥಿಕವಾಗಿ ಸಂಕಷ್ಟ ಎದುರಾಗಲಿದೆ.
ಇನ್ನು, ಮೇ 4ರಂದು ತನ್ನದೇ ಆಧಿಪತ್ಯದ ರಾಶಿಯಾದ ವೃಷಭಕ್ಕೆ ಶುಕ್ರನ ಪ್ರವೇಶವಾಗಲಿದ್ದು, ಮೇ 28ರವರೆಗೂ ಆತ ಅಲ್ಲಿಯೇ ಇರಲಿದ್ದಾನೆ. ನಂತರ, ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದು, ನಿಮಗೆ ಶುಭವಾರ್ತೆ ನೀಡಲಿದ್ದಾನೆ. ಈ ವೇಳೆ, ನಿಮ್ಮ ಹಣಕಾಸಿನ ಸ್ಥಿತಿ ಸುಧಾರಿಸಲಿದೆ. ಇನ್ನು, ಮೇ 26ರಂದು ಬುಧ, ವೃಷಭದಿಂದ ಮಿಥುನ ರಾಶಿಗೆ ಪ್ರವೇಶ ಮಾಡಲಿದ್ದು, ನಿಮಗೆ ಅನುಕೂಲಕರ.
ಜೊತೆಗೆ, ಮೂರನೇ ಮನೆಯಲ್ಲಿರುವ ಶನಿ ನಿಮ್ಮ ರಾಶಿಗೆ ಒಳಿತನ್ನೇ ಉಂಟು ಮಾಡಲಿದ್ದಾನೆ. ಪಿತ್ರಾರ್ಜಿತ ಆಸ್ತಿಯಲ್ಲಿ ಲಾಭ ಬರುವ ಯೋಗವಿದೆ. ವಾಹನ ಖರೀದಿ ಮಾಡಲಿದ್ದೀರಿ. ಸಾಮಾಜಿಕ ಕ್ಷೇತ್ರದಲ್ಲಿ, ರಾಜಕೀಯ ಕ್ಷೇತ್ರದಲ್ಲಿ ಇರುವವರಿಗೆ ಉತ್ತಮ ಸ್ಥಾನಮಾನಗಳು ಲಭಿಸಲಿವೆ. ಕುಟುಂಬದಲ್ಲಿ ಮಂಗಳ ಕಾರ್ಯಗಳು ಕೂಡ ಜರುಗಲಿವೆ. ಈ ಮಧ್ಯೆ, ಮೇ 23ರಂದು ಮಕರ ರಾಶಿಯಲ್ಲಿ ಶನಿಯ ವಕ್ರಗತಿಯ ಚಲನೆ ಆರಂಭವಾಗಲಿದೆ.
ಇನ್ನು, ಪರಿಹಾರದ ಬಗ್ಗೆ ನೋಡೋದಾದ್ರೆ, ಮೃತ್ಯುಂಜಯ ಜಪ, ನವಗ್ರಹ ಶಾಂತಿ, ಸುಬ್ರಹ್ಮಣ್ಯನ ಆರಾಧನೆಗಳ ಮೂಲಕ ನಿಮ್ಮ ಸಂಕಷ್ಟಗಳನ್ನು ದೂರ ಮಾಡಿಕೊಳ್ಳಬಹುದು. ಒಟ್ಟಾರೆ ನೋಡುವುದಾದರೆ, ನಿಮಗೆ ಈ ತಿಂಗಳು ಮಿಶ್ರಫಲದಾಯಕ ಎನ್ನಬಹುದು. ಇನ್ನು, ವೃಶ್ಚಿಕ ರಾಶಿಯವರಿಗೆ ಭಾನುವಾರ ಮತ್ತು ಗುರುವಾರ ಶುಭವಾರ. ನಿಮ್ಮ ರಾಶಿಯ ಅದೃಷ್ಟ ಸಂಖ್ಯೆ 1 ಮತ್ತು 5.
"ಉದ್ದಿಮೆಗಳನ್ನು ನಡೆಸುವುದು ಸರ್ಕಾರದ ಕೆಲಸವಲ್ಲ' ಇದು ಪ್ರಧಾನಿ ನರೇಂದ್ರ ಮೋದಿಯವರ ಖಡಕ್ ಮಾತು. ಆ ಮೂಲಕ ಸರಕಾರಿ ಸ್ವಾಮ್ಯದ ಮತ್ತಷ್ಟು ಸಂಸ್ಥೆಗಳನ್ನು ಖಾಸಗಿಯವರ ಕೈಗೆ ಹಸ್ತಾಂತರಿಸುವ ಸ್ಪಷ್ಟ ಸಂದೇಶವನ್ನು ಪ್ರಧಾನಿ ನೀಡಿದ್ದಾರೆ.
ಸರ್ಕಾರಿ ಸ್ವಾಮ್ಯದ ಸಂಸ್ಥೆಗಳನ್ನು ಸಂಪೂರ್ಣವಾಗಿ ಖಾಸಗಿಯವರಿಗೆ ಮಾರಾಟ ಮಾಡುವುದು, ಇಲ್ಲವೇ ಲೀಸ್ ಮೇಲೆ ನೀಡುವುದು ಅಥವಾ ತನ್ನ ಹಕ್ಕುಸ್ವಾಮ್ಯವನ್ನು ಬಿಟ್ಟುಕೊಡುವುದು, ಸರಕಾರಿ ಸ್ವಾಮ್ಯದ ಸಂಸ್ಥೆಗಳಲ್ಲಿನ ಷೇರುಗಳನ್ನು ಮಾರಾಟ ಮಾಡಿ, ಹಂತ, ಹಂತವಾಗಿ ಅದನ್ನು ಖಾಸಗೀಕರಣಗೊಳಿಸುವುದು, ವಿವಿಧ ವಲಯಗಳಲ್ಲಿ ಖಾಸಗಿಯವರಿಗೆ ಬಂಡವಾಳ ಹೂಡಲು ಅವಕಾಶ ಮಾಡಿಕೊಡುವುದು ಖಾಸಗೀಕರಣದ ಒಂದು ಪ್ರಕ್ರಿಯೆ.
ಹಾಗೆ ನೋಡಿದರೆ, ದೇಶದಲ್ಲಿ ಸರಕಾರಿ ಸ್ವಾಮ್ಯದ ಸಂಸ್ಥೆಗಳ ಖಾಸಗೀಕರಣ ಪ್ರಕ್ರಿಯೆ ಆರಂಭವಾಗಿ ಹಲವು ದಶಕಗಳೇ ಕಳೆದು ಹೋಗಿವೆ. ಈ ಹಿಂದೆ ದಿವಂಗತ ರಾಜೀವ್ ಗಾಂಧಿ ಸರಕಾರದ ಅವಧಿಯಲ್ಲಿ ನೇಮಿಸಲಾಗಿದ್ದ ಅರ್ಜುನ್ ಸೇನ್ ಗುಪ್ತಾ ಸಮಿತಿ ಹಾಗೂ 1993ರಲ್ಲಿ ರಚಿಸಲಾಗಿದ್ದ ಸಿ.ರಂಗರಾಜನ್ ನೇತೃತ್ವದ ಸಮಿತಿಗಳು ಸಾರ್ವಜನಿಕ ರಂಗದಲ್ಲಿನ ಉದ್ದಿಮೆಗಳಲ್ಲಿನ ಹೂಡಿಕೆ ಹಿಂತೆಗೆತಕ್ಕೆ ಶಿಫಾರಸ್ಸು ಮಾಡಿದ್ದವು. ಇನ್ನು, 1991ರಲ್ಲಿ ಆರ್ಥಿಕ ಉದಾರೀಕರಣದ ಯುಗ ಆರಂಭವಾಗುತ್ತಿದ್ದಂತೆ ಎಲ್ಲಾ ಸಮಸ್ಯೆಗಳಿಗೂ ಖಾಸಗೀಕರಣವೇ ಪರಿಹಾರ ಎಂಬ ಭಾವನೆಯನ್ನು ಹುಟ್ಟು ಹಾಕಲು ಕೇಂದ್ರ ಸರ್ಕಾರ ಯತ್ನಿಸಿತು.
ನಂತರ, 2000-01ರಲ್ಲಿ ಅಟಲ್ ಬಿಹಾರಿ ವಾಜಪೇಯಿ ನೇತೃತ್ವದ ಸರ್ಕಾರವಿದ್ದಾಗ ಹೂಡಿಕೆ ಹಿಂತೆಗೆತ ಪ್ರಕ್ರಿಯೆಗೆ ವಿಶೇಷ ಚಾಲನೆ ದೊರಕಿತು. ಅಲ್ಲಿಯವರೆಗೆ ಹೂಡಿಕೆ ಹಿಂತೆಗೆತಕ್ಕಾಗಿ ಪ್ರತ್ಯೇಕ ಸಚಿವರನ್ನು ನಿಯುಕ್ತಿಗೊಳಿಸಲಾಗುತ್ತಿತ್ತೇ ಹೊರತು, ಹೂಡಿಕೆ ಹಿಂತೆಗೆತಕ್ಕಾಗಿಯೇ ಪ್ರತ್ಯೇಕ ಸಚಿವರ ನೇಮಕ ಇರಲಿಲ್ಲ. ಆದರೆ, ವಾಜಪೇಯಿ ಸರ್ಕಾರದಲ್ಲಿ ಅದೇ ಮೊದಲ ಬಾರಿಗೆ ಹೂಡಿಕೆ ಹಿಂತೆಗೆತಕ್ಕಾಗಿಯೇ ಪ್ರತ್ಯೇಕ ಸಚಿವರನ್ನು ನೇಮಿಸಲಾಯಿತು. ಹೂಡಿಕೆ ಹಿಂತೆಗೆತ ಖಾತೆಯ ಕ್ಯಾಬಿನೆಟ್ ಸಚಿವರಾಗಿ ಅರುಣ್ ಶೌರಿ ನೇಮಕಗೊಂಡರು. ಆದರೆ, 2001ರಲ್ಲಿ ಅದೇ ವಾಜಪೇಯಿ ಸರಕಾರ ಸಾರ್ವಜನಿಕ ಬ್ಯಾಂಕ್‍ಗಳ ಹೂಡಿಕೆ ಹಿಂತೆಗೆತಕ್ಕೆ ಮುಂದಾದಾಗ ತೀವ್ರ ವಿರೋಧ ವ್ಯಕ್ತವಾಯಿತು. ಹೀಗಾಗಿ, ಆ ಪ್ರಕ್ರಿಯೆ ಮುಂದುವರಿಯಲಿಲ್ಲ.
ಇನ್ನು, ಮನಮೋಹನ್ ಸಿಂಗ್ ನೇತೃತ್ವದ ಯುಪಿಎ ಸರಕಾರದ ಅವಧಿಯಲ್ಲಿಯೂ ಹೂಡಿಕೆ ಹಿಂತೆಗೆತ ಪ್ರಕ್ರಿಯೆ ಮುಂದುವರಿಯಿತು. 2013-14ರಲ್ಲಿ ಯುಪಿಎ ಸರಕಾರದ ಅವಧಿಯಲ್ಲಿ ಹೂಡಿಕೆ ಹಿಂತೆಗೆತದಿಂದ 40 ಸಾವಿರ ಕೋಟಿ ರೂ.ಗಳ ಆದಾಯವನ್ನು ಸರ್ಕಾರ ನಿರೀಕ್ಷಿಸಿತ್ತು. ಆದರೆ, ಬಂದದ್ದು ಮಾತ್ರ 15,819 ಕೋಟಿ ರೂ. ಅಷ್ಟೇ ಅಲ್ಲ, ತಾತ್ವಿಕವಾಗಿ ಹೂಡಿಕೆ ಹಿಂತೆಗೆತದಿಂದ ಬಂದ ಆದಾಯವನ್ನು ಸರ್ಕಾರ ಮೂಲಭೂತ ಸೌಕರ್ಯಗಳ ಅಭಿವೃದ್ಧಿಗೆ ಬಳಸಬೇಕು. ಆದರೆ, ಇದನ್ನು ವಿತ್ತೀಯ ಕೊರತೆ ತುಂಬಿಕೊಳ್ಳಲು ಬಳಸಲಾಯಿತು.
ನಂತರ ಬಂದ ಮೋದಿ ಸರ್ಕಾರ, ಖಾಸಗೀಕರಣ ಪ್ರಕ್ರಿಯೆಗೆ ಮತ್ತಷ್ಟು ವೇಗ ನೀಡಿತು. 2014-15ರಲ್ಲಿ ಕೋಲ್ ಇಂಡಿಯಾ ಮತ್ತು ಸ್ಟೀಲ್ ಅಥಾರಿಟಿ ಆಫ್ ಇಂಡಿಯಾ ಕಂಪನಿಗಳ ಷೇರುಗಳ ಮಾರಾಟದಿಂದ ಮೋದಿ ಸರಕಾರ 24,257 ಕೋಟಿ ರೂ. ಸಂಗ್ರಹಿಸಿತು. 2015-16ರಲ್ಲಿ ಅಂದಿನ ಹಣಕಾಸು ಸಚಿವ ಜೇಟ್ಲಿಯವರು ದೇಶದಲ್ಲಿನ ಪ್ರಮುಖ ಬಂದರುಗಳನ್ನು ಖಾಸಗೀಕರಣ ಮಾಡುವ ಪ್ರಸ್ತಾಪ ಮಂಡಿಸಿದರು. ಪರಿಣಾಮ ಇಂದು ಹಲವು ಪ್ರಮುಖ ಬಂದರುಗಳ ಕಾರ್ಯ ನಿರ್ವಹಣೆಯ ಹೊಣೆ ಖಾಸಗಿಯವರ ಪಾಲಾಗಿದೆ.
ಪ್ರಸ್ತುತ ಕೊರೊನಾ ಸಂಕಷ್ಟದಿಂದ ದೇಶದ ಆರ್ಥಿಕ ಪರಿಸ್ಥಿತಿ ಹದಗೆಟ್ಟಿದ್ದು, ವಿತ್ತೀಯ ಕೊರತೆಯನ್ನು ತುಂಬಿಸಿಕೊಳ್ಳಲು ಮೋದಿಯವರ ಸರ್ಕಾರ ದೊಡ್ಡ ಮಟ್ಟದಲ್ಲಿಯೇ ಖಾಸಗೀಕರಣ ಪ್ರಕ್ರಿಯೆಗೆ ಮುಂದಾಗಿದೆ. ಮುಂದಿನ ಹಣಕಾಸು ವರ್ಷದಲ್ಲಿ ತನ್ನ ಒಡೆತನದಲ್ಲಿರುವ ಆಸ್ತಿಗಳ ಮಾರಾಟದಿಂದ 2.5 ಲಕ್ಷ ಕೋಟಿ ರೂ. ಆದಾಯ ಸಂಗ್ರಹಿಸುವುದು ಸರಕಾರದ ಗುರಿ. ಈ ನಿಟ್ಟಿನಲ್ಲಿ ಈಗಾಗಲೇ 8 ಸಚಿವಾಲಯಗಳು ತಮ್ಮ ವ್ಯಾಪ್ತಿಯಲ್ಲಿ ಮಾರಾಟ ಮಾಡಲು ಯೋಗ್ಯವಾದ ಸಂಪತ್ತನ್ನು ಗುರುತಿಸಿವೆ. ಹೀಗಾಗಿ, ಮುಂದಿನ ದಿನಗಳಲ್ಲಿ 100ಕ್ಕೂ ಹೆಚ್ಚು ಸರ್ಕಾರಿ ಉದ್ಯಮಗಳು ಖಾಸಗೀಕರಣಗೊಳ್ಳಲಿವೆ. ಇಂಧನ, ಪೆಟ್ರೋಲಿಯಂ, ಕಲ್ಲಿದ್ದಲು ಹಾಗೂ ಇತರ ಮಿನರಲ್ಸ್, ಅಣುಶಕ್ತಿ, ರಕ್ಷಣೆ, ಬಾಹ್ಯಾಕಾಶ, ಬ್ಯಾಂಕಿಂಗ್, ಇನ್ಶುರೆನ್ಸ್, ಹಣಕಾಸು ನಿರ್ವಹಣೆ, ಸಾರಿಗೆ ಮತ್ತು ದೂರಸಂಪರ್ಕ ವಲಯಗಳಲ್ಲಿ ಬಂಡವಾಳ ಹಿಂತೆಗೆತದ ಉದ್ದೇಶ ಹೊಂದಲಾಗಿದೆ. ಬ್ಯಾಂಕ್ ಮತ್ತು ಇನ್ಸೂರೆನ್ಸ್ ಕಂಪನಿ ಸೇರಿದಂತೆ 12 ಸಾರ್ವಜನಿಕ ವಲಯದ ಕಂಪನಿಗಳ ಮಾರಾಟದಿಂದ 1.75 ಲಕ್ಷ ಕೋಟಿ ಸಂಗ್ರಹಿಸುವುದು ಸರಕಾರದ ಗುರಿ.
ಈಗಾಗಲೇ 150 ಪ್ರಯಾಣಿಕ ರೈಲುಗಳ ಓಡಾಟಕ್ಕೆ ಖಾಸಗಿಯವರಿಗೆ ಅನುಮತಿ ನೀಡಲಾಗಿದೆ. 50 ನಿಲ್ದಾಣಗಳ ಮರು ಅಭಿವೃದ್ಧಿಗೆ ಯೋಜಿಸಲಾಗಿದೆ. ಆ ಮೂಲಕ ಪ್ರಸಕ್ತ ಹಣಕಾಸು ವರ್ಷದಲ್ಲಿ 90 ಸಾವಿರ ಕೋಟಿ ರೂ.ಗಳ ಸಂಗ್ರಹಣೆಯ ಗುರಿ ಹೊಂದಲಾಗಿದೆ. ಅಲ್ಲದೆ, ಬಿಎಸ್‍ಎನ್‍ಎಲ್, ಎಂಟಿಎನ್‍ಎಲ್ ಆಸ್ತಿಗಳ ಮಾರಾಟದಿಂದ 40 ಸಾವಿರ ಕೋಟಿ ರೂ.ಗಳನ್ನು ಸಂಗ್ರಹಿಸಲು ಉದ್ದೇಶಿಸಲಾಗಿದೆ. ಎಎಐನ 13 ವಿಮಾನ ನಿಲ್ದಾಣಗಳು, ದೆಹಲಿ, ಬೆಂಗಳೂರು, ಮುಂಬೈ, ಹೈದರಾಬಾದ್ ವಿಮಾನ ನಿಲ್ದಾಣಗಳಲ್ಲಿನ ಜಂಟಿ ಪಾಲುದಾರಿಕೆ ಹೂಡಿಕೆ ಹಿಂತೆಗೆದುಕೊಳ್ಳಲು ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರ ನಿರ್ಧರಿಸಿದ್ದು, ಇದರಿಂದ 20 ಸಾವಿರ ಕೋಟಿ ರೂ. ಸಂಗ್ರಹಿಸಲು ಉದ್ದೇಶಿಸಲಾಗಿದೆ. ಇನ್ನು, ಪವರ್ ಗ್ರಿಡ್‍ಗಳ ಪ್ರಸರಣ ಆಸ್ತಿಯಿಂದ 27 ಸಾವಿರ ಕೋಟಿ, ಜಿಎಐಎಲ್, ಐಒಸಿಎಲ್ ಮತ್ತು ಎಚ್‍ಪಿಸಿಎಲ್ ಕೊಳವೆ ಮಾರ್ಗದಿಂದ 17 ಸಾವಿರ ಕೋಟಿ ರೂ.ಗಳ ಸಂಗ್ರಹಣೆಗೆ ಸರ್ಕಾರ ಮುಂದಾಗಿದೆ. ದೇಶದ ಹಲವು ಬಂದರುಗಳನ್ನು ಖಾಸಗಿಯವರಿಗೆ ನೀಡುವ ಮೂಲಕ 30ಕ್ಕೂ ಹೆಚ್ಚು ಬರ್ತ್‍ಗಳಿಂದ 4 ಸಾವಿರ ಕೋಟಿ ರೂ. ಸಂಗ್ರಹಿಸುವ ಗುರಿ ಹೊಂದಲಾಗಿದೆ. ಅದೇ ರೀತಿ, ದೆಹಲಿಯ ಜವಾಹರಲಾಲ್ ನೆಹರೂ ಕ್ರೀಡಾಂಗಣವನ್ನು ಲೀಸ್‍ಗೆ ನೀಡಲಾಗಿದೆ. ರೈಲ್ವೆಯ ಅಂಗಸಂಸ್ಥೆಗಳಾದ ಕಂಟೇನರ್ ಕಾರ್ಪೊರೇಷನ್ ಆಫ್ ಇಂಡಿಯಾ, ಇರ್ಕಾನ್ ಇಂಟರ್ ನ್ಯಾಷನಲ್, ಎಚ್‍ಎಎಲ್, ಆರ್‍ಐಎನ್‍ಎಲ್‍ಗಳಲ್ಲಿನ ಬಂಡವಾಳ ಹಿಂತೆಗೆತ ಪ್ರಕ್ರಿಯೆಗೆ ಮುಂದಿನ ತಿಂಗಳುಗಳಲ್ಲೇ ಚಾಲನೆ ದೊರೆಯಲಿದೆ.
ಖಾಸಗೀಕರಣದಲ್ಲಿನ ಕಾರ್ಯಕ್ಷಮತೆ ಸಾರ್ವಜನಿಕ ರಂಗದಲ್ಲಿ ಇರುವುದಿಲ್ಲ. ಹೀಗಾಗಿ, ಸಾರ್ವಜನಿಕರ ತೆರಿಗೆ ಹಣದಲ್ಲಿ ಅವುಗಳ ನಿರ್ವಹಣೆ ಮಾಡುವ ಬದಲು, ಅದನ್ನು ಮಾರುವುದೇ ಉತ್ತಮ ಎನ್ನುತ್ತಾರೆ ಖಾಸಗೀಕರಣದ ಪರ ಇರುವವರು. ಆದರೆ, ಖಾಸಗೀಕರಣಕ್ಕೆ ಸಾಕಷ್ಟು ದೊಡ್ಡ ಮಟ್ಟದಲ್ಲೇ ವಿರೋಧ ವ್ಯಕ್ತವಾಗುತ್ತಿದ್ದು, ತಮ್ಮದೇ ಆದ ಕಾರಣಗಳನ್ನು ಅವರು ಮುಂದಿಡುತ್ತಿದ್ದಾರೆ.
- ಖಾಸಗಿ ವಲಯದ ನಿರ್ಮಾಣ ಉದ್ದಿಮೆಗಳು, ರಿಯಲ್ ಎಸ್ಟೇಟ್ ವ್ಯವಹಾರಸ್ಥರು ಹಾಗೂ ಖಾಸಗಿ ಬ್ಯಾಂಕ್‍ಗಳ ಬೇಕಾಬಿಟ್ಟಿ ಧೋರಣೆಯಿಂದ 2007-08ರಲ್ಲಿ ಅಮೆರಿಕ ದೊಡ್ಡ ಆರ್ಥಿಕ ಹಿಂಜರಿತ ಅನುಭವಿಸಬೇಕಾಗಿ ಬಂತು. ಆಗ ಅಲ್ಲಿನ ಸರ್ಕಾರ ಖಾಸಗಿ ಬ್ಯಾಂಕ್‍ಗಳನ್ನು ರಾಷ್ಟ್ರೀಕರಣಗೊಳಿಸಿತು. ಬ್ರಿಟನ್‍ನಲ್ಲಿ 1999ರಲ್ಲಿ ಖಾಸಗೀಕರಣದ ಗಾಳಿ ಪ್ರಾರಂಭವಾಗಿ ಮುಂದಿನ 7 ವರ್ಷಗಳಲ್ಲಿ ಬಿರುಗಾಳಿಯಾಗಿ ಪರಿಣಮಿಸಿತು. ಅನೇಕ ವಲಯಗಳು ಖಾಸಗಿಯವರ ಪಾಲಾದ ಕಾರಣ ಬೆಲೆಗಳು ಏರಿಕೆಯಾಗಿ ಜನಸಾಮಾನ್ಯರು ಬಳಲುವಂತಾಯಿತು ಎನ್ನುವ ವಾದ ಇವರದು.
- ಕೊರೊನಾ ಸಂಕಷ್ಟದ ಸಮಯದಲ್ಲಿ ದೇಶದೆಲ್ಲೆಡೆ ಖಾಸಗಿ ವಲಯದ ಕಂಪನಿಗಳು ವೆಚ್ಚ ಕಡಿತ, ಆಟೋಮೇಷನ್, ಸಾಮಥ್ರ್ಯ ಕೊರತೆಯ ಕಾರಣಗಳನ್ನು ನೀಡಿ ನೌಕರರನ್ನು ಮನಬಂದಂತೆ ಕೆಲಸದಿಂದ ತೆಗೆದು ಹಾಕಿದರು. ಹೀಗೆ ಬೀದಿಗೆ ಬಿದ್ದವರಿಗೆ ರಕ್ಷಣೆ ದೊರೆಯಲಿಲ್ಲ. ಸರಕಾರಗಳು ಅಸಹಾಯಕವಾದವು. ಇನ್ನು ಮೋದಿ ಸರಕಾರ, ಪ್ಯಾಕೇಜ್ ಹೆಸರಲ್ಲಿ ನಿಮಗೆ ಸಾಲ ಕೊಡ್ತೀವಿ, ಸ್ವಂತ ಉದ್ದಿಮೆ ಮಾಡಿ ಬದುಕಿಕೊಳ್ಳಿ ಎಂಬ ಸಲಹೆ ನೀಡಿ, ಕೈ ತೊಳೆದುಕೊಂಡಿತು. ಇನ್ನು ಕರ್ನಾಟಕದಲ್ಲಿ, ಕಾರ್ಮಿಕರನ್ನು ಕೆಲಸದಿಂದ ತೆಗೆದು ಹಾಕಿದರೆ ಎಚ್ಚರ ಎಂಬುದಾಗಿ ಕಂಪನಿಗಳಿಗೆ ಎಚ್ಚರಿಕೆ ನೀಡಿದ ಕಾರ್ಮಿಕ ಇಲಾಖೆಯ ಕಾರ್ಯದರ್ಶಿಯನ್ನು ಸರಕಾರ ಒಂದೇ ದಿನದಲ್ಲಿ ಎತ್ತಂಗಡಿ ಮಾಡಿತು. ಮಕ್ಕಳ ಟ್ಯೂಷನ್ ಫೀಸ್ ಕಡಿಮೆ ಮಾಡಿ ಎಂಬ ಸರಕಾರದ ಮನವಿಗೆ ಖಾಸಗಿ ಶಿಕ್ಷಣ ಸಂಸ್ಥೆಗಳು ಕ್ಯಾರೇ ಮಾಡುತ್ತಿಲ್ಲ. ಆದರೀಗ ಸರಕಾರ ಮೌನಕ್ಕೆ ಶರಣಾಗಿದೆ.
- ಖಾಸಗಿಕರಣದಿಂದ ವ್ಯಕ್ತಿಗಳು ಶ್ರೀಮಂತರಾಗುತ್ತಾರೆ. ದೇಶದ ಸಂಪತ್ತು ಕೆಲವೇ ಶ್ರೀಮಂತರ ಕೈಗೆ ಸಿಗುತ್ತದೆ. ಆದರೆ, ದೇಶ ಬಡವಾಗುತ್ತದೆ. ಸರಕಾರದ ಆಸ್ತಿ ಒಂದೊಂದಾಗಿ ಕರಗುತ್ತಾ ಹೋದಂತೆ, ಸರಕಾರ ದುರ್ಬಲವಾಗಿ ಬಿಡುತ್ತದೆ.
- ಅಮೆರಿಕದಂತಹ ಮುಂದುವರಿದ ರಾಷ್ಟ್ರಗಳಲ್ಲಿ ಸರಕಾರದ ನೀತಿ-ನಿರೂಪಣೆಗಳಲ್ಲಿ ಖಾಸಗಿ ಕಂಪನಿಗಳು ತಮ್ಮ ಪ್ರಭಾವ ಬೀರುವಷ್ಟರ ಮಟ್ಟಿಗೆ ಪ್ರಭಾವಶಾಲಿಗಳಾಗಿದ್ದಾರೆ. ಅಲ್ಲಿ ಖಾಸಗಿ ಕಂಪನಿಗಳು ಲಾಬಿ ನಡೆಸುವುದು ಕಾನೂನಿನ ಮಾನ್ಯತೆ ಪಡೆದುಕೊಂಡಿದ್ದು, ಇದಕ್ಕಾಗಿಯೇ ಅವು ಪ್ರತಿವರ್ಷ ಮಿಲಿಯನ್‍ಗಟ್ಟಲೆ ಬಂಡವಾಳ ಹೂಡುತ್ತವೆ. ಮುಂದಿನ ದಿನಗಳಲ್ಲಿ ಇದು ನಮ್ಮಲ್ಲೂ ಬರಬಹುದು ಎಂಬ ಆತಂಕವನ್ನೂ ಖಾಸಗೀಕರಣದ ವಿರೋಧಿಗಳು ಮುಂದಿಡುತ್ತಿದ್ದಾರೆ.
